საკოორდინაციო საბჭოს გადაწყვეტილებით, საზოგადოებრივი თავშეყრის ადგილებში, კორონავირუსის გავრცელების პრევენციის მიზნით ზომები კიდევ უფრო გამკაცრდა.
მიღებულია დამატებითი ზომები.
ავტოსადგურების ადმინისტრაციები ვალდებულნი არიან, განახორციელონ მგზავრთა თერმოსკრინინგი და აწარმოონ მგზავრთა იდენტიფიცირების ჟურნალი.
მუნიციპალური ინსპექციის ადმინისტრაციული ზედამხედველობის სამსახურმა, შრომის ინსპექციასა და სურსათის უვნებლობის სამსახურთან ერთად, ბოლო ერთი კვირის განმავლობაში 2350 ობიექტი შეამოწმა.
ასევე მონიტორინგი განხორციელდა ბანკებში, აფთიაქებსა და სავაჭრო დაწესებულებებში.
20 899 -ჯერ შემოწმდა მუნიციპალური ავტობუსი.
15 ათასჯერ - სამარშუტო ტაქსი.
შედეგად, პირბადის გარეშე მგზავრობისთვის 573 პირს შეეზღუდა ტრანსპორტით გადაადგილება.
718-ჯერ შემოწმდა ბათუმში არსებული სასტუმროს ტიპის დაწესებულებები. 224 ობიექტი აკმაყოფილებს ჯანდაცვის სამინისტროს რეკომენდაციებს და შესაბამისად აგრძელებს ფუნქციონირებას.
გადამოწმდა 360 სილამაზის სალონი.
მიმდინარეობს საჯარო და კერძო სკოლების შემოწმება. რაც შეეხება საჯარო და კერძო ბაღებს, შემოწმება 15 სექტემბრიდან დაიწყო.
საკოორდინაციო საბჭო მოუწოდებს მოქალაქეებს, გამოიჩინონ განსაკუთრებული სიფრთხილე და ზედმიწევნით დაიცვან ყველა მითითება, რომელიც აუცილებელია მათი ჯანმრთელობის დაცვისა და კოვიდ-19-ის მასობრივი გავრცელების პრევენციისთვის.