თბილისში სამარშუტო ტაქსების მოძრაობასთან დაკავშირებით ტენდერი მიმდინარე წლის ბოლომე გამოცხადდება. ამ პროცესს ხელი რომ არ შეეშალოს, პარლამენტი კანონპროექტს "ლიცენზიებისა და ნებართვების შესახებ კანონში ცვლილებების შეტანის თაობაზე" მიმდინარე სასესიო კვირას დაჩქარებული წესით განიხილავს.
როგორც დარგობრივი ეკონომიკის კომიტეტის თავმჯდომარემ გიორგი მელაძემ აღნიშნა, თბილისის საკრებულომ უკვე გააკეთა განაცხადი, საკითხის წლის ბოლომდე განხილვის შესახებ.
"პროცესს ხელი რომ არ შეეშალოს, კანონპრეოქტი დაჩქარებული წესით მივიღოთ, "-აღნიშნა მელაძემ.
ინიციატივის თანახმად, იცვლება საქალაქო რეგულარულ სამგზავრო გადაყვანებზე ნებართვების გაცემის წესი.
ახალი წესის თანახმად, სამარშუტო ტაქსების მძღოლებს მგზავრთა გადაყვანაზე ნებართვის აღება მოუწევთ. ნებართვის ასაღებად კი გარკვეული პირობების დაკმაყოფილება და კონკურსში გამარჯვება იქნება საჭირო.
კონკურსის წესსა და ნებართვის გაცემის ფასს განსაზღვრავს ადგილობრივი თვითმმართველი ორგანო. ხოლო თბილისში ადგილობრივი საქალაქო რეგულარული სამგზავრო გადაყვანის ნებართვის ფასს საკრებულო განსაზღვრავს.
საკრებულო დაამტკიცებს ნებართვსი გაცემის წესსაც, თუმცა ეს უნდა მოხდეს თბილისის მერის წარდგინებით.
ნებართვის ფასის გადახდის წესს თბილისის მთავრობა ამტკიცებს.