ვიცეპრემიერმა, იუსტიციის მინისტრმა თეა წულუკიანმა, ამბროლაურის მუნიციპალიტეტის სოფელ ჭრებალოში მშენებარე საზოგადოებრივი ცენტრი დაათვალიერა და მიმდინარე სამშენებლო სამუშაოებს გაეცნო. იუსტიციის მინისტრთან ერთად იმყოფებოდა სახელმწიფო სერვისების განვითარების სააგენტოს ხელმძღვანელი ზურაბ სანიკიძე და იუსტიციის სამინისტროს სხვადასხვა სსიპების ხელმძღვანელები.
ცენტრი ჭრებალოსა და მიმდებარე სოფლების − ზედა და ქვედა ჭყვიშის, პირველი და მეორე ტოლის, ქვიშარის, ჟოშხის, გენდუშის, პატარაონის, შავრის, ბაჯის, ღადიშის, ღვარდიის − და სხვა დასახლებების 5 000-მდე მოსახლეს მოემსახურება.
ცენტრის გახსნის შემდეგ ადგილობრივი მოსახლეობა ადგილიდან გაუსვლელად შეძლებს სახელმწიფო და კერძო სექტორის 200-ზე მეტი მომსახურების ერთი ფანჯრის პრინციპით კომფორტულ გარემოში სწრაფად მიღებას. ცენტრში ხელმისაწვდომი იქნება „მაგთისა“ და „ლიბერთი ბანკის“ მომსახურებაც, რაც პენსიონერებს − სოფლიდან გაუსვლელად პენსიის მიღების, ახალგაზრდებს კი, უკაბელო ინტერნეტით უფასოდ სარგებლობის საშუალებას მისცემს. ადგილობრივ მოსახლეობასთან ერთად, სტუმრებიც ისარგებლებენ ხელმისაწვდომი საბანკო მომსახურებით, მობილური ოპერატორის საშუალებით სამყაროსთან 24-საათიანი კავშირით, უკაბელო ინტერნეტითა და უფასო სკაიპის ოთახით.
საზოგადოებრივ ცენტრში უახლესი ტექნიკით აღჭურვილი ბიბლიოთეკა განთავსდება. ელექტრონულ წიგნებთან ერთად, აქ ბეჭდური გამოცემებიც იქნება დაცული. ცენტრში მოეწყობა საკონფერენციო დარბაზი, სადაც მოსახლეობა სხვადასხვა ტიპის შეხვედრების გამართვას შეძლებს. საზოგადოებრივ ცენტრებში განთავსდება მუნიციპალიტეტის წარმომადგენლების მისაღები ოთახებიც.
სოფელ ჭრებალოში საზოგადოებრივი ცენტრის მშენებლობა გაერო-ს განვითარების პროგრამა „მდგრადი განვითარების მიზნების“ (UNDP) მხარდაჭერით, შვეიცარიისა და ავსტრიის მთავრობებთან თანამშრომლობით ხორციელდება. „UNDP“, შვეიცარიის თანამშრომლობისა და განვითარების სააგენტო (SDC) და ავსტრიის განვითარების სააგენტო (ADC) ორი საზოგადოებრივი ცენტრის − ყაჩაღანისა და ჭრებალოს − მშენებლობას აფინანსებენ. შესაბამის ხელშეკრულებას „UNDP“-მ და სახელმწიფო სერვისების განვითარების სააგენტომ ხელი 2019 წლის 26 თებერვალს მოაწერეს.
ჭრებალოს საზოგადოებრივი ცენტრის მშენებლობა მიმდინარე წლის 5 ივლისს დაიწყო. სამშენებლო სამუშაოებს ტენდერში გამარჯვებული კომპანია „მთაწმინდა 2007“ აწარმოებს. საზოგადოებრივი ცენტრი მომდევნო წელს გაიხსნება.