„საერთაშორისო გამჭვირვალობა - საქართველომ“ დღეს საზოგადოებრივი აზრის გამოკითხვის შედეგები გამოაქვეყნა.
უმრავლესობას მიაჩნია, რომ პოლიცია ადამიანების დაკავების მიზნით, ნარკოტიკული ნივთიერების ჩადების მეთოდს იყენებს.
კვლევის მიხედვით, გამოკითხულთა 45% ეთანხმება მოსაზრებას, რომ სამართალდამცველი ორგანოების თანამშრომლები კონკრეტული ადამიანების დაკავების მიზნით, იყენებენ ნარკოტიკული ნივთიერების ჩადების მეთოდს. ხოლო 35% აღნიშნულ მოსაზრებას არ ეთანხმება.
კვლევა „საერთაშორისო გამჭვირვალობა - საქართველოს“ დაკვეთით „კავკასიის კვლევითი რესურსების ცენტრმა“ განახორციელა.
კვლევის ფარგლებში, რომელიც 2018 წლის 3-28 მარტის პერიოდში ჩატარდა, მთელი საქართველოს მასშტაბით 1843 ადამიანი გამოიკითხა. გამოკითხვის საშუალო ცდომილება 2,8 პროცენტს შეადგენს.