საერთაშორისო საზღვაო ორგანიზაცია აფრთხილებს თავის წევრ-სახელმწიფოებს მოსალოდნელი სანქციების შესახებ საქართველოს ტერიტორიული წყლების აფხაზეთის ნაწილში ნაოსნობის უკანონოდ განხორციელებისათვის _ წინააღმდეგ შემთხვევაში საქართველოს მხრიდან ჯარიმა დაწესდება.
საერთაშორისო საზღვაო ორგანიზაციისათვის საქართველოს საგარეო უწყების მიერ გაგზავნილ წერილში მითითებული იყო, რომ აფხაზეთი წარმოადგენს საქართველოს განუყოფელ ნაწილს, რომელიც იმყოფება რუსეთის ოკუპაციის ქვეშ და რომ საქართველოს ტერიტორიული მთლიანობა აღიარებულია საერთაშორისო თანამეგობრობის მიერ.
აქედან გამომდინარე აფხაზეთში უკანონო ნაოსნობის ნებისმიერი მცდელობა მიიჩნევა საერთაშორისო სამართლის ძირითადი ნორმებისა და პრინციპების დარღვევად, რადგან საზღვაო სამართლის შესახებ გაეროს 1982 წლის კონვენციის თანახმად ტერიტორიულ ზღვაზე ვრცელდება საქართველოს სუვერენიტეტი.
საერთაშორისო საზღვაო ორგანიზაციიდან მიღებული წერილის შესახებ ოფიციალურ ინფორმაციას საქართველოს საგარეო საქმეთა სამინისტრო ავრცელებს.
