"ნიკორას" მენეჯმენტი სურსათის უვნებლობის, ვეტერენარიისა და მცენარეთა დაცვის სამსახურს ადგილობრივი წარმოების დისკრედიტაციაში ადანაშაულებს.
გენერალურმა დირექტორის ირაკლი ლომაიას თქმით, 26 მარტს სამსახურის მიერ გამოქვეყნებული კვლევის შედეგები რძის პროდუქტების ბაზარზე არსებულ ვითარებას არ შეესაბამებოდა.
"სამსახურის წარმომადგენლებმა მწარმოებლებს განგვიმარტეს, რომ კვლევის შედეგები მედიის მხრიდან არასწორად გაშუქდა. თუმცა, სამსახურს დამახინჯებული ფაქტების შესახებ განმარტებები არ გაუკეთებია", - აღნიშნა ლომაიამ.
ლომაიას განმარტებით, სურსათის უვნებლობის სამსახურის მიერ გაკეთებული განცხადების შედეგად კომპანიას ფინანსური ზარალი არ მიუღია, თუმცა საზოგადოებაში საქმიანი რეპუტაცია შეილახა.
სურსათის უვნებლობის, ვეტერინარიისა და მცენარეთა დაცვის ეროვნული სამსახურის კვლევის თანახმად, რძის პროდუქტების მწარმოებელი 6 ქართული კომპანიიდან მხოლოდ ორის "ვიმ-ბილ-დან ჯორჯიას" და "ქობულეთურის" პროდუქციის შემადგენლობა შეესაბამება ეტიკეტზე მითითებულ ინფორმაციას.
„მომხმარებელა უფლებების დაცვის შესახებ" საქართველოს კანონში შეტანილი ცვლილებების თანახმად, რძის მწარმოებლები ვალდებულები არიან ეტიკეტზე მიუთითონ, პროდუქცია ნატურალური რძისგან არის დამზადებული, თუ რძის ფხვნილისგან. ირაკლი ლომაიას განცხადებით, აღნიშნული პროცედურები კომპანიამ უკვე დაასრულა.
"ნიკორა" რძის პროდუქტების სეგმენტში რამდენიმე დასახელების ნაწარმს უშვებს "ჩვენი ფერმერის" ბრენდით. ლომაიას განმარტებით, რძის პროდუქტები საღი რძის გარდა, რძის ფხვნილითაც მზადდება და ამის შესახებ დეტალური ინფორმაცია პროდუქციის ეტიკეტზეა მითითებული. "საქართველოში წლის ყველა სეზონზე, განსაკუთრებით ზამთრის პერიოდში, წარმოებაში მხოლოდ საღი რძის გამოყენება პრობლემებთან არის დაკავშირებული. ეტიკეტირების მოთხოვნა, კი გვავალდებულებს, რომ პროდუქციაში რძის ფხვნილის მცირე დოზით გამოყენებაც კი მივუთითოთ, რასაც ვაკეთებთ კიდეც", - განაცხადა ლომაიამ.
