დევნილთა გრძელვადიანი განსახლების საკითხებთან დაკავშირებით ლტოლვილთა და განსახლების მინისტრის კობა სუბელიანის მონაწილეობით ზუგდიდში საკოორდინაციო შეხვედრა გაიმართა. შეხვედრაში მონაწილეობას იღებდნენ ადგილობრივი თვითმმართველობისა და გაეროს ლტოლვილთა უმაღლესი კომისარიატის წარმომადგენლებიც. დევნილთა განსახლების საკითხებთან დაკავშირებით საკოორდინაციო შეხვედრები პერიოდულად იმართება, ამჯერად კი სენაკსა და დაბა ჯვარში მიმდინარე სარეაბილიტაციო ობიექტებზე ისაუბრეს.
ლტოლვილთა და განსახლების მინისტრმა კობა სუბელიანმა აღნიშნა რომ მაისის ბოლოსთვის 110 ბინის რეაბილიტაცია დასრულდება: “ეს არის ერთ-ერთი მუშა შეხვედრა გაეროს ლტოლვილთა უმაღლეს კომისარიატთან, რომელიც რეგულარულად იმართება. საუბარი შეეხო სენაკში 40 ბინიანი კორპუსის რემონტს, რომელიც მაისის ბოლოს დასრულდება და 70 ბინიანი კორპუსის რეაბილიტაციას დაბა ჯვარში. ამ ბინებში აფხაზეთიდან დევნილები მაშინვე შესახლდებიან, როგორც კი რემონტი დასრულდება.”
როგორც საკოორდინაციო შეხვედრაზე გაეროს ლტოლვილთა უმაღლესი კომისარიატის წარმომადგენელმა დასავლეთ საქართველოში სრეჩკო ნიუმანმა აღნიშნა, დევნილების საკითხებზე სამინისტროსთან კოორდინაცია მათი ერთ-ერთი მთავარი ფუნქციაა: “დევნილთა საცხოვრებელი პირობების გაუმჯობესება სამოქმედო გეგმის ერთ-ერთი შემადგენელი ნაწილია. შეხვედრის მიზანია ამ საქმიანობის უკეთ კოორდინაცია და სამეგრელოს რეგიონში მიმდინარე პროექტებზე ინფორმაციის გაცვლა. 2009 წლიდან გაეროს ლტოლვილთა უმაღლესი კომისარიატი ამ საქმიანობაში ჩართულია პარტნიორებთან ერთად. დანიის ლტოლვილთა საბჭოსთან ერთად აშენდა და შეკეთდა 135 ბინა და პროცესი გრძელდება.”
მასალის გამოყენების პირობები