აჭარის სანაპირო ზოლში სტიქიით მიყენებული ზარალის ოდენობა 3 მილიონ ლარამდეა
საქართველო, თბილისი - 2013-03-25 13:40:00
აჭარის სანაპირო ზოლში სტიქიით მიყენებული ზარალის ოდენობა 2-დან 3 მილიონ ლარამდეა, აღნიშნულ ინფორმაციას ბათუმის მერია ავრცელებს. მერიის ინფორმაციით, ძლიერმა შტორმმა ბათუმის სანაპირო მნიშვნელოვნად დააზიანა. ახალ ბულვარში შტორმმა ბილიკი წაიღო, დაიტბორა ხიმშიაშვილის ქუჩა, აეროპორტის გზაზე დაზიანდა მწვანე ნარგავები და განათების ბოძები, დანაგვიანდა სანაპირო ზოლი.ოფიციალური ინფორმაციით, შტორმის სიმძლავრემ 6 ბალი შეადგინა.სტიქიის ზონაში მთელი ღამის განმავლობაში მუშაობდნენ მერიის სახანძრო დაცვისა და საგანგებო სიტუაციათა სამსახურის წარმომადგენლები. ამ ეტაპზე, მიმდინარეობს ზარალის დათვლა და სანაპიროს გაწმენდითი სამუშაოები.
ბოლო მონაცემებით, აჭარის სანაპირო ზოლში სტიქიით მიყენებული ზარალის ოდენობა 2-დან 3 მილიონ ლარამდეა. აჭარის მთავრობაში შექმნილია საგანგებო შტაბი, რომელიც 24 საათიან რეჟიმში მუშაობს.
შტაბთან დაკავშირება შესაძლებელია აჭარის მთავრობის აპარატში ამოქმედებული ცხელი ხაზის მეშვეობით, ნომერზე 27-20-01