პრინც ფილიპს 17 აპრილს დაკრძალავენ, ბრიტანეთში 8-დღიანი გლოვა გამოცხადდა
საქართველო, თბილისი - 2021-04-10 21:55:00
ბუკინგემის სასახლის ინფორმაციით, გაერთიანებული სამეფოს დედოფლის ელისაბედ მეორის მეუღლეს, პრინც ფილიპს 17 აპრილს დაკრძალავენ.
ბრიტანეთის პრემიერ-მინისტრმა, ბორის ჯონსონმა პრინცის გარდაცვალების გამო ქვეყანაში 8-დღიანი გლოვა გამოაცხადა, რომელიც 17 აპრილს დასრულდება.
პრინც ფილიპს, მისი სურვილისამებრ, უინძორის ციხე-სიმაგრის წმინდა გიორგის სამლოცველოში დაკრძალავენ.
ედინბურგის ჰერცოგი, პრინცი ფილიპი გუშინ, 99 წლისა გარდაიცვალა.
ფილიპი პრინცესა ელისაბედზე 1947 წელს დაქორწინდა. სამეფო წყვილს ოთხი შვილი, რვა შვილიშვილი და 10 შვილთაშვილი ჰყავს.