ჯანმო-ს ინფორმაციით, იზრდება კორონავირუსით ინფიცირებისა და გარდაცვალების მაჩვენებელი
საქართველო, თბილისი - 2021-03-24 10:08:00
ჯანმრთელობის მსოფლიო ორგანიზაციის მიერ გამოქვეყნებული განახლებული ინფორმაციით, მეოთხე კვირაა კვლავ იზრდება კორონავირუსით ინფიცირების მაჩვენებელი.
გასული კვირის განმავლობაში, მსოფლიოში კორონავირუსის 3.3 მილიონამდე ახალი შემთხვევა აღრიცხეს, რაც წინა კვირასთან შედარებით, 8%-ით მეტია.
ორგანიზაციის ცნობით, გარდაცვალების მაჩვენებლის ექვსთვიანი კლების ტენდენციის შემდეგ, ბოლო ერთ კვირაში მსოფლიოში COVID-19-ით გარდაიცვალა 60 400-ზე მეტი ადამიანი, რაც იმას ნიშნავს, რომ 3%-ით არის გაზრდილი ვირუსის შედეგად გარდაცვალების რაოდენობა.
ახალი შემთხვევების რაოდენობის მკვეთრი ზრდა დაფიქსირდა სამხრეთ-აღმოსავლეთ აზიაში, წყნარი ოკეანის დასავლეთ ნაწილში, ევროპის და აღმოსავლეთ ხმელთაშუაზღვისპირეთის რეგიონებში.
ჯანმრთელობის მსოფლიო ორგანიზაციის ინფორმაციით, კორონავირუსის ახალი შემთხვევებისა და გარდაცვალების მაჩვენებლის 80% მოდის ევროპასა და ჩრდილოეთ და სამხრეთ ამერიკაზე.