საფრანგეთის პრეზიდენტმა ემანუელ მაკრონმა ბელარუსის ლიდერ ალესანდრ ლუკაშენკა სატელეფონო საუბრის დროს გააფრთხილა, რომ მინსკი უკრაინის წინააღმდგ ერუსეთის ომში უფრო აქტიურად არ ჩაერთოს.
Agence France-Presse-ის ინფორმაციით, რომელიც ელისეს სასახლესთან დაახლოებულ წყაროს ეყრდნობა, ეს 2022 წლის შემდეგ მაკრონსა და ლუკაშენკას შორის პირველი საჯაროდ ცნობილი პირდაპირი კონტაქტი იყო.
წყაროს ცნობით, მაკრონმა საუბრისას ბელარუსისთვის არსებულ რისკებზე გაამახვილა ყურადღება, რომლებიც რუსეთის აგრესიულ ომში უფრო აქტიურ ჩართულობას უკავშირდება.
საფრანგეთის პრეზიდენტმა ასევე ლუკაშენკას მოუწოდა, რეგიონში მზარდი დაძაბულობისა და NATO-ს აღმოსავლეთ ფლანგზე სამხედრო აქტივობის გაძლიერების ფონზე, ევროპასთან ურთიერთობების გაუმჯობესებაზე იფიქროს.
სატელეფონო საუბარი მას შემდეგ შედგა, რაც უკრაინის პრეზიდენტმა ვოლოდიმირ ზელენსკიმ ბელარუსის საზღვარზე დამატებითი ძალების განთავსების ბრძანება გასცა და განაცხადა, რომ მოსკოვი შესაძლოა ბელარუსის ტერიტორიიდან ახალი შეტევისთვის ემზადებოდეს.
მიუხედავად იმისა, რომ რუსეთმა ეს ინფორმაცია უარყო, შეშფოთება გაიზარდა რუსეთ-ბელარუსის ერთობლივი ბირთვული წვრთნებისა და ბელარუსში „ორეშნიკის“ ტიპის რუსული სარაკეტო სისტემების განთავსების შემდეგ, რომლებსაც ბირთვული ქობინების ტარება შეუძლია.
