სუდანის სამხრეთ კორდოფანის შტატში სამოქალაქო ინფრასტრუქტურაზე პარამილიტარული დაჯგუფება „სწრაფი რეაგირების ძალების“ (RSF) თავდასხმების სერიის შედეგად, სულ მცირე 116 ადამიანი, მათ შორის 46 ბავშვი დაიღუპა. ამის შესახებ Al Jazeera ადგილობრივ ჰუმანიტარულ ორგანიზაციებზე დაყრდნობით იუწყება.
პირველი თავდასხმა ხუთშაბათს, ქალაქ კალოგში მოხდა.
RSF-ის მებრძოლებმა, სუდანის „სახალხო-განმათავისუფლებელი მოძრაობის“ (ჩრდილოეთის ფრთა) წევრებთან ერთად, დრონებითა და არტილერიით დაბომბეს საბავშვო ბაღი, ქალაქის საავადმყოფო და სამთავრობო შენობა.
მხოლოდ ამ თავდასხმას 71 ადამიანის სიცოცხლე შეეწირა.
სუდანის ექიმების ქსელის წარმომადგენლებმა განაცხადეს, რომ როდესაც პარამედიკოსები ადგილზე მივიდნენ დაშავებულების დასახმარებლად, ისინი მეორე მოულოდნელი თავდასხმის სამიზნეები გახდნენ.
რეგიონში კომუნიკაციის სერიოზული შეფერხებების გამო, ნგრევის მასშტაბისა და მსხვერპლის რაოდენობის შესახებ ზუსტი მონაცემების მიღება უკიდურესად რთულია.
სავარაუდოდ, მსხვერპლთა რაოდენობა გაცილებით მეტი იქნება.
გაერო-ს ბავშვთა ფონდმა (UNICEF) მკაცრად დაგმო RSF-ის მებრძოლების ქმედებები.
ორგანიზაციის წარმომადგენელმა სუდანში, შელდონ იეტმა, საგანმანათლებლო დაწესებულებაში ბავშვების მკვლელობას „ბავშვთა უფლებების საშინელი დარღვევა“ უწოდა.
„ბავშვები არასდროს უნდა იტანჯებოდნენ კონფლიქტის დროს“, - განაცხადა იეტმა და მოუწოდა მხარეებს, „დაუყოვნებლივ შეწყვიტონ თავდასხმები და უზრუნველყონ ჰუმანიტარული დახმარების უსაფრთხო და შეუფერხებელი მიწოდება მათთვის, ვისაც ეს უკიდურესად ესაჭიროება“.
სუდანში მიმდინარეობს ძალაუფლებისთვის ბრძოლა ქვეყნის ორ მთავარ სამხედრო ძალას - ოფიციალურ არმიას, რომელიც ცნობილია როგორც სუდანის შეიარაღებული ძალები (SAF) და პარამილიტარულ სწრაფი რეაგირების ძალებს (RSF) შორის.
2023 წლის აპრილში სრულმასშტაბიანი საბრძოლო მოქმედებების დაწყებამდე, ორი ფრაქციის ლიდერები, ორი გენერალი, მოკავშირეები იყვნენ, რომლებმაც ერთობლივად განახორციელეს სამხედრო გადატრიალება.
თუმცა, მათი ალიანსი დაიშალა ქვეყნის საბოლოო კონტროლის საკითხთან დაკავშირებით ღრმა უთანხმოების გამო, რაც ძალაუფლებისთვის ღია ომში გადაიზარდა.
ომმა გამოიწვია ის, რასაც ჰუმანიტარული სააგენტოები მსოფლიოში უდიდეს ჰუმანიტარულ კრიზისს უწოდებენ. ათიათასობით ადამიანი დაიღუპა და მილიონობით ადამიანი იძულებული გახდა, საკუთარი სახლები დაეტოვებინა.
ქვეყნის ინფრასტრუქტურა, განსაკუთრებით ჯანდაცვის სისტემა, ჩამოინგრა: საომარი მოქმედებების ზონებში საავადმყოფოების უმეტესობა დანგრეულია ან არ ფუნქციონირებს, ხოლო ჰუმანიტარული დახმარების მიწოდება უკიდურესად რთულია მუდმივი ბრძოლებისა და ბლოკადის გამო.
