ე.წ. "ნეიტრალიტეტის" მოთხოვნასთან დაკავშირებული განცხადებები, რეალურად, პირდაპირი რუსული პროპაგანდაა - წერს მარგვეთისა და უბისის ეპისკოპოსი მელქისედეკის (ხაჩიძე) ფეისბუკზე გამოქვეყნებულ სიტყვაში.
ეპისკოპოსი აღნიშნავს, რომ "ნეიტრალიტეტი“ აწყობს ყველაზე მეტად ჩრდილოელ მტერს, რომ უპრობლემოდ დაიპყროს საქართველო და დამოუკიდებლობა წაგვართვას.
"აქტიურად ვრცელდება ე.წ. "ნეიტრალიტეტის" მოთხოვნასთან დაკავშირებული განცხადებები, რომლებიც, რეალურად, პირდაპირი რუსული პროპაგანდაა. წარსული გამოცდილება გვაჩვენებს, რომ ჩვენი სწორედ ასეთი "ნეიტრალიტეტი" აწყობს ყველაზე მეტად ჩრდილოელ მტერს, რომ უპრობლემოდ დაგვიპყროს და დამოუკიდებლობა წაგვართვას. ძლიერი დასავლელი პარტნიორები და დასავლური ცივილიზაციის სრულფასოვანი წევრობა, პირდაპირპროპორციულია იმისა, რომ მტერი ჩვენს დამოუკიდებლობასა და სუვერენიტეტს ვერ შეეხება. როგორმე უნდა მოვახერხოთ, რომ ეს მარტივი ჭეშმარიტება ჩვენს თანამოქალაქეებამდე მივიტანოთ. მოდით, დღეს, 2020 წლის 26 მაისს დავიწყოთ ეს ყველაფერი", - წერს ეპისკოპოსი.