მუხრან მაჭავარიანს მთაწმინდის პანთეონში დაკრძალავენ. ამის შესახებ გიგი უგულავამ ფილარმონიაში, წიგნის XII საერთაშორისო ფესტივალის გახსნაზე განაცხადა.
უგულავას თქმით, მიუხედავად იმისა, რომ მთაწმინდაზე საფლავის ადგილის პრობლემა არსებობს, უახლოეს მომავალში შესაბამისი კომისია შეიკრიბება და მაჭავარიანის საფლავისთვის ადგილის გამოძებნაზე იზრუნებს. უგულავას განმარტებით დაკრძალვის პროცესს მხოლოდ ტექნიკური მიზეზები უშლის ხელს, რომლის მოგვარებაც აღნიშნულ კომისიას დაევალება. ამასთან, გამოჩენილი ქართველი პოეტის დაკრძალვისთვის აუცილებელ ხარჯებს თბილისის მერია გაიღებს
"ჩვენ ჩავთვალეთ საჭიროდ, რომ ისეთი გამორჩეული პოეტი და საზოგადო მოღვაწე, რომლის სახელთანაც დაკავშირებულია ეროვნული მოძრაობა, ქართული ლექსის სხვა სიმაღლესა და რანგში აყვანა, უნდა გამოინახოს ადგილი მთაწმინდაზე. ჩვენ რევიზია გავუკეთეთ ჩვენსავე გადაწყვეტილებას, ოჯახთან ერთად მოვილაპარაკეთ, რომ მუხრან მაჭავარიანი დაიკრძალება მთაწმინდის საზოგადო მოღვაწეთა პანთეონში", - განაცხადა გიგი უგულავამ.
შეგახსენებთ, რომ თბილისის მერიის გადაწყვეტილებით, მთაწმინდის საზოგადო მოღვაწეთა პანთეონი ოთარ ჭილაძის დაკრძალვის შემდეგ დაიხურა, თუმცა მერიამ მუხრან მაჭავარიანისთვის გამონაკლისი დაუშვა.