პროკურატურის ინიციატივით ქედის, შუახევის და ხულოს საჯარო სკოლების მოსწავლეებს შორის მკლავჭიდის ტურნირის ფინალი მოეწყო. ღონისძიება ქედის სპორტულ სკოლაში გაიმართა, ასპარეზობაში მოანწილეობა მიიღო შესარჩევ ტურნირებში გამარჯვებულმა 10-მა მოსწავლემ სხვადასხვა წონით კატეგორიაში.
ფინალური შეჯიბრი ოლიმპიური სისტემით წარიმართა, ყველა მონაწილეს გადაეცა სპეციალური დიპლომები, გამარჯვებულები კი _ მედლებით დაჯილდოვდნენ.
სპორტულ ღონისძებას საქართველოს პროკურატურა არასრულწლოვანთა დანაშაულის პრევენციის კამპანიის ფარგლებში ახორციელებს, პროექტის ძირითადი მიზანი მოსწავლეებში ჯანსაღი ცხოვრების წესის დანერგვა და არასრულწლოვნების დანაშაულებრივი გზისათვის არიდებაა.
როგორც ცნობილია, საქართველოს პროკურატურამ და განათლებისა და მეცნიერების სამინისტრომ 2010 წელი უსაფრთხო სკოლისა და არასრულწლოვანთა დანაშაულის პრევენციის წლად გამოაცხადეს. მხოლოდ მიმდინარე წელს, საქართველოს სხვადასხვა რეგიონებში, პროკურატურამ მოსწავლეთათვის ოცზე მეტ სპორტულ ღონისძიებას გაუწია ორგანიზება.