რუსეთის ფედერაციის პრეზიდენტი დიმიტრი მედვედევი არ გამორიცხავს, რომ ყირგიზეთის სცენარი დსთ-ს ქვეყნებშიც განვითარდეს, თუ ისინი ყირგიზეთის ყოფილი პრეზიდენტის ყურმანბეკ ბაკიევის პოლიტიკურ გზას გაყვებიან. ამის შესახებ "რია ნოვოსტი" იუწყება.
"არსებობს საშიშროება, რომ პოსტსაბჭოთა ქვეყნებში ყირგიზეთის მსგავსი სცენარი განვითარდეს. ყველაფერი შესაძლებელია მოხდეს, თუ ხალხი ხელისუფლების უკმაყოფილოა და ხელისუფლება მათ პრობლემების მოგვარებაზე არ ზრუნავს. ასეთ შემთხვევაში ეს სცენარი შეიძლება ნებისმიერ ქვეყანაში განხორცილდეს, მითუმეტეს როცა ხელისუფლება საზოგადოებასთან უშუალო კონტაქტს კარგავს", - განუცხადა ჟურნალისტებს მედვედევმა.
შეგახსენებთ, რომ ყირგიზეთში 6-7 აპრილს მომხდარი არეულობის შედეგად ასამდე ადამიანი დაიღუპა, 1600-ზე მეტი კი დაშავდა. ამ დროისთვის ყირგიზეთს ეროვნული თანხმობის დროებითი მთავრობა მართავს, რომელსაც საგარეო საქმეთა ექს-მინისტრი როზა ოტუმბაევა ხელმძღვანელობს. ყირგიზეთის პრეზიდენტმა ყურმანბეკ ბაკიევმა კი გუშინ ქვეყანა დატოვა და ყაზახეთში გაემგზავრა, სადაც თანამდებობიდან გადადგომის შესახებ განცხადება გააკეთა.
