გარემოს დაცვისა და ბუნებრივი რესურსების მინისტრმა გოგა ხაჩიძემ და სასჯელაღსრულების, პრობაციისა და იურიდიული დახმარების საკითხთა მინისტრმა ხათუნა კალმხელიძემ ქსნის კოლონიის მიმდებარე ტერიტორიაზე გაამწვანების აქციაში მიიღეს მონაწილეობა. "დარგე ხე - გაამწვანე შენი გარემო" - აქციაში ქსნის საერთო და მკაცრი რეჟიმის დაწესებულების მსჯავრდებულებმაც მიიღეს მონაწილეობა.
კოლონიის მიმდებარე ტერიტორიაზე 100-მდე წიწვოვანი და ფოთლოვანი ჯიშის ნერგი დაირგო.
"არავის ვუსურვებ ამ დაწესებულებაში მოხვედრას, მაგრამ თუ ასე მოხდა, ძალიან მნიშვნელოვანია, რომ ამ ახალ ციხესთან ერთად, რომელიც მართლაც შთაბეჭდილებას ახდენს, რა შთაბეჭდილებაც შეიძლება ციხემ მოახდინოს, მნიშვნელოვანია, რომ გარემოც შესაბამისი დახვდებათ, რაზედაც უკვე ზრუნავს ციხის ადმინისტრაცია და სამინისტროს ხელმძღვანელობა", _ განაცხადა ხაჩიძემ.
"ქსნის ახალი დაწესებულების მშენებლობა პრაქტიკულად დასრულებულია, მიმდინარეობს დასუფთავების სამუშაო. მიმაჩნია, რომ გამწვანება არის ძალიან მნიშვნელოვანი. გარემოს დაცვის მინისტრმა გამოიჩინა კეთილი ნება და დღეს დავრგეთ ხეები. შემდეგ კვირას უკვე შეგვიძლია გავხსნათ ახალი დაწესებულება", _ განაცხადა კალმახელიძემ.
გასული წლის შემოდგომასა და გაზაფხულზე გარემოს დაცვის სამინისტრომ უკვე განახორციელა გამწვანების აქცია, რომლის ფარგლებშიც დედაქალაქსა და საქართველოს რეგიონებში 300 ათასზე მეტი ნერგი დაირგო.