ამ წუთებში პარლამენტის წინ უკანონო და პოლიტპატიმრების მხარდამჭერი აქცია მიმდინარეობს. პარლამენტის შენობის წინ რამდენიმე ასეული მომიტინგეა შეკრებილი. მომიტინგეების ერთმა ნაწილმა რუსთაველის გამზირი გადაკეტა. აქციას მანანა არჩვაძე-გამსახურდიას მომხრეებთან ერთად სხვადსხვა ოპოზიციური პარტიების და ადამიანის უფლებათა დამცველი ორგანიზაციები ესწრებიან. მათ შორის "კონსერვატიული პარტიის" ლიდერები ზვიად ძიძიგური და კახა კუკავა; "დაიცავი საქართველოს" ლიდერი ლევან გაჩეჩილაძე; "დემოკრატიული მოძრაობა - ერთიანი საქართველოს" ლიდერი ნინო ბურჯანაძე; "ალიანსი საქართველოსთვის" თანათავმჯდომარე სოზარ სუბარი; "ხალხის პარტიის" ლიდერი კობა დავითაშვილი; "ქართული დასის" ლიდერი ჯონდი ბაღათურია; "ლეიბორისტული პარტიის" გენერალური მდივანი სოსო შატბერაშვილი; "მოძრაობა სოლიდარობა უკანონო პატიმრების" დამფუძვნებელი ეკა ბესელია და სხვა.
როგორც მიტინგზე სიტყვით გამომსვლელები აღნიშანავენ, ამ დროისთვის საქართველოში 60-ზე მეტი პოლიტპატიმარი და 100-ზე მეტი უკანონო პატიმარია. მათი თქმით, ეს ადამიანები სააკაშვილის პირადი ტყვეები არიან. ოპოზიციის ლიდერები ხელისუფლებას მოუწოდებენ, დაუყოვნებლივ გაათავისუფლონ ცოტნე გამსახურდია; სერგო ბესელია და სხვა მათი თქმით, პოლიტპატიმრები.
დღევანდელ აქციაზე ეკა ბესელიამ შესაბამისი მიმართვის ტექსტიც წაიკითხა, რომელსაც ხელს საქართველოში არსებული თითქმის ყველა ადამიანის უფლებათა დამცველი ორგანიზაცია და ოპოზიციური პარტია აწერს. მიმართვის თანახმად, ტექსტის ავტორები ხელისუფლებას ორ პირობას უყენებენ: 1-ელი უნდა შეწყდეს პოლიტიკური ნიშნით ადამიანების დაპატიმრება და მეორე - ხვალიდან, 16 აპრილიდან ხელისუფლებამ ყველა პოლიტპატიმარი უნდა გაათავისუფლოს.
"იმ შემთხვევაში თუ ჩვენი მოთხოვნა არ შესრულდება აქციები უფრო ფართომასშტაბიან სახეს მიიღებს. ეს ადამიანები პოლიტპატიმრებად მხოლოდ ჩვენს მიერ არ არიან აღიარებულები, ამის შესახებ საუბარია აშშ-ს სახელმწიფო დეპარტამენტის 2010 წლის ანგარიშშიც", - განაცხადა ეკა ბესელიამ.