პოლონეთის პრეზიდენტის სამთავრობო თვითმფრინავი, რომელიც სმოლენსკთან ჩამოვარდა შესაძლოა "ვიღაცის მითითებებით მოქმედებდა", მიიჩნევს პოლონეთის ექს-პრეზიდენტი ლეხ ვალენსა.
მისი თქმით, პოლონეთის სამთავრობო ავიარაზმის პილოტები უმაღლესი კვალიფიკაციის პროფესიონალები არიან.
"საეჭვოა, რომ ნისლის პირობებში პილოტს შეეძლო დამოუკიდებლად რამდენჯერმე ეცადა თვითმფრინავის დასმა", - აცხადებს ვალენსა.
ვალენსას თქმით, იმისთვის, რომ გაკეთდეს კატასტროფის მიზეზების დადგენის საბოლოო დასკვნა აუცილებელია ოფიციალური, სპეციალური კომისიის დასკვნის დალოდება.
უნდა აღინიშნოს, რომ პოლონეთის პრეზიდენტის ავიარაზმის მფრინავები მუდმივად მოქმედებდნენ დადგენილი წესების მიხედვით. 2008 წლის აგვისტოში უსაფრთხოების გარანტიების არ არსებობის გამო სამთავრობო თვითმფრინავის მეთაურმა არ შესრულა პრეზიდენტ კაჩინსკის მითითება და ავიალაინერი თბილისის აეროპორტის ნაცვლად ბაქოში დასვა.
შეგახსენებთ, რომ რუსეთის საჰაერო ძალების მთავრი შტაბის უფროსის მოადგილის გენერალ-ლეინტენანტის ალექსანდრ ალიოშინის განცხადებით პოლონეთის პრეზიდენტის ლეხ კაჩინსკის თვითმფრინავის ეკიპაჟმა რამდენჯრმე არ შეასრულა "სმოლენსკის" აეროპორტის ფრენების ხელმძღვანელის მითითებები.
"1,5 კილომეტრის დაშორებით ხელმძღვანელობის ჯგუფმა შეამჩნია, რომ ეკიპაჟმა გაზარდა დაშვების ვერტიკალური სიჩქარე. ფრენების ხელმძღვანელმა ეკიპაჟს გასცა ბრძანება თვითმფრინავის ჰორიზონტალურ მდგომარეობაში გადაყვანის შესახებ და როდესაც ეკიპაჟმა არ შეასრულა მითითება, რამდენჯერმე გაიცა ბრძანება სათადარიგო აეროდრომზე დაშვების თაობაზე", - განაცხადა ალიოშინმა.
"ამის მიუხედავად, ეკიპაჟი აგრძელებდა დაშვებას. სამწუხაროდ ეს ტრაგიკულად დასრულდა.", - აღნიშნა რუსმა გენერალმა.