შეიარაღებული ძალების სპეციალური ოპერაციების დაჯგუფების გუნდმა ხრიდოლის (ხელჩართული ბრძოლის სახეობა) ტურნირში პირველი ადგილი მოიპოვა. ხელჩართულ ბრძოლაში მეორე პირად-გუნდური პირველობა თავდაცვის სამინისტროს სპორტულ კომპლექს "ორბში" გაიმართა. შეჯიბრებაში საქართველოს შეიარაღებული ძალების სხვადასხვა ქვედანაყოფის 60 სამხედრო მოსამსახურე მონაწილეობდა. ტურნირი 7 წონით კატეგორიაში ჩატარდა. სხვადასხვა წონით კატეგორიაში გამარჯვებულები ოქროს, ვერცხლის, ბრინჯაოს მედლებით და სიგელებით დაჯილდოვდნენ.
შეჯიბრის მიზანი შეიარაღებული ძალების შემადგენლობაში ქართული ხელჩართული ბრძოლის - ხრიდოლის დანერგვა და განვითარებაა. ხრიდოლი ქართული საბრძოლო ხელოვნების ხუთ უძველეს სახეობას: ჭიდაობას, რკენას, კრივს, ფარიკაობასა და მშვილდოსნობას აერთიანებს.
"შეჯიბრებაში თითქმის ყველა ქვედანაყოფიდან მონაწილეობდნენ სამხედრო მოსამსახურეები. ჯარისკაცები ენთუზიაზმით ჩაებნენ შეჯიბრში; მნიშვნელოვანია, რომ ქართველი მეომარი ძველ საბრძოლო ტრადიციებს იბრუნებს, რაც შემდეგში საბრძოლო მზადყოფნას და გამარჯვებისკენ წინსვლას განაპირობებს~, - განაცხადა შეიარაღებული ძალების მთავარმა სერჟანტმა ალუდა კოპალიანმა.
ტურნირი ხრიდოლში საქართველოს თავდაცვის სამინისტროსა და ქართული საბრძოლო ხელოვნების ფედერაციის მხარდაჭერით ჩატარდა.