რუსი დეპუტატები რომლებიც დღეს საქართველოს ოკუპირებული რეგიონების ე.წ. სახელმწიფო საზღვრების დაცვის შესახებ ხელშეკრულებას განიხილავენ აცხადებენ, რომ ამ ხელშეკრულების რატიფიცირებით არც ერთი საერთაშორისო ნორმა არ ირღვევა.
"რუსეთი არაფერს არ აკანონებს, აქ საქმე ეხება სუვერენულ ქვეყნებს შორის შეთანხმებას. საერთაშორისო სამართლის პრაქტიკა ითვალისწინებს გარკვეული დროით ამა თუ იმ უფლებამოსილების გადაცემას. ამ შემთხვევაში არსებობს შეთანხმება ჩვენს ქვეყნებს შორის და თანამშრომლობის ეს ფორმატი არის სამწუხაროდ ერთადერთი, რადგანაც საკუთარი სასაზღვრო სამსახური ჯერ არც სამხრეთ ოსეთში და არც აფხაზეთში არ არსებობს", _ აცხადებს რუსეთის დუმის საერთაშორისო საქმეთა კომიტეტის თავმჯდომარე კონსტანტინე კოსაჩოვი.
აღსანიშნავია, რომ რუსეთის სათათბირო საქართველოს ოკუპირებული რეგიონების ე.წ. სახელმწიფო საზღვრების დაცვის შესახებ ხელშეკრულების რატიფიკაციას მოახდენს. შეთანხმების თანახმად, რუსეთს უფლება ენიჭება ე.წ. სახელმწიფო საზღვრები სრულად გააკონტროლოს, მათ შორის საზღვაო აკვატორიაც. ოკუპირებული ტერიტორიების ადმინისტრაციული საზვრების მთელს პერიმეტრზე რუსეთის ფედერაციის უშიშროების სამსახურის წარმომადგენლები განლაგდებიან.
დოკუმენტში აფხაზეთსა და ე.წ. სამხრეთ ოსეთში რუს აგრესორთა მესაზღვრეების სტატუსი და პირობებიცაა გაწერილი. აფხაზეთთან და ე.წ. სამხრეთ ოსეთთან გაფორმებული შეთანხმებების განხილვის წინადადებით დუმას პრეზიდენტმა მედვედევმა მიმართა.