სემინარზე მისასალმებელი სიტყვებით გამოვიდნენ საქართველოს საგარეო საქმეთა მინისტრის მოადგილე დავით ჯალაღანია, თბილისში ევროკავშირის დელეგაციის პოლიტიკური, ეკონომიკური და საინფორმაციო სექციის ხელმძღვანელი, პირველი მრჩეველი რობერტ ლიდელი, უნგრეთის რესპუბლიკის საგარეო საქმეთა სამინისტროს ევროკავშირის საგარეო და უსაფრთხოების პოლიტიკის დეპარტამენტის დირექტორის მოადგილე, ვიშეგრადის ჯგუფის უნგრული თავმჯდომარეობის წარმომადგენელი, ქრისტოფ ფორაი და განვითარების პროგრამების უფროსი ვიცე-თავმჯდომარე სანდორ კოლესი. სემინარს ესწრებიან მთავრობის, მთავრობათშორისი ინსტიტუტებისა და სამოქალაქო საზოგადოების ორგანიზაციათა წარმომადგენლები სამი რეგიონიდან, რომლებიც 15 ქვეყანას მოიცავს, ასევე, ევეროკავშირისა და საერთაშორისო ორგანიზაციათა წარმომადგენლები, დამოუკიდებელი ექსპერტები.

მონაწილე ქვეყნების სახელისუფლებო და სამოქალაქო სექტორის ექსპერტები განიხილავენ და ერთმანეთს გაუზიარებენ რეგიონული ეკონომიკური თანამშრომლობის სფეროში დაგროვილ გამოცდილებას, შეაფასებენ დანერგილ პრაქტიკას, კერძოდ, ვიშეგრადის ჯგუფის თანამშრომლობის ფარგლებში, და განსაზღვრავენ საერთაშორისო ვაჭრობის, ენერგოპოლიტიკისა და უცხოური ინვესტიციების მოზიდვის კუთხით არსებულ გამოწვევებსა და შესაძლებლობებს.
კერძოდ, მონაწილეები განსაზღვრავენ ერთობლივი ღონისძიებების იმ პოტენციურ სფეროებს, რომლებიც შესაძლოა განხორციელდეს სუამისა და დასავლეთ ბალკანეთის ქვეყნებში რეგიონული ეკონომიკური თანამშრომლობის ხელშეწყობის მიზნით, ევროკავშირისა და ვიშეგრადის ჯგუფის მხარდაჭერით, ან საკუთარი ინიციატივით.
სემინარის შედეგები წარმოდგენილი იქნება პრეს-კონფერენციაზე პარასკევს, 12 მარტს, 13.00 საათზე.