დღეს, 3 მარტს, საქართველოს ევროკავშირის მაღალი რანგის დელეგაცია ეწვევა. დელეგაციას ევროკავშირის ამჟამინდელი თავმჯდომარე ქვეყნის - ესპანეთის საგარეო საქმეთა და თანამშრომლობის მინისტრი მიგელ-ანხელ მორატინოსი უხელმძღვანელებს.
დაგეგმილია შეხვედრა საქართველოს საგარეო საქმეთა მინისტრ გრიგოლ ვაშაძესთან, რომლის დასრულების შემდეგ ერთობლივი პრესკონფერენცია გაიმართება.
საქართველოს საგარეო საქმეთა მინისტრის მოადგილის ნინო კალანდაძის ინფორმაციით, ევროკავშირის დელეგაციას მიეწოდება ამომწურავი ინფორმაცია უსაფრთხოების კუთხით საქართველოში და ოკუპირებულ ტერიტორიებზე არსებული ვითარების შესახებ. მისივე თქმით, შეხვედრებისას ერთ-ერთი პრიორიტეტული ის იქნება, რომ ევროკავშირის მონიტორინგის მისიამ თავისი ფუნქციების განხორციელება კონფლიქტურ რეგიონებშიც შეძლოს.
ევროკავშირის დელეგაციის წევრები ყაზბეგი-ზემო ლარსის სასაზღვრო-გამშვებ პუნქტსაც მოინახულებენ, რისი სურვილიც თავად გამოთქვეს.
აღსანიშნავია, რომ სტუმრები საქართველოს პრეზიდენტს, პარლამენტის თავმჯდომარეს, საგარეო უწყების ხელმძღვანელსა და რეინტეგრაციის საკითხებში სახელმწიფო მინისტრს შეხვდებიან.
ევროკავშირის დელეგაცია საქართველოს 4 მარტს დატოვებს.