საქართველოს კომერციული ბანკების მიერ იურიდიული პირების დაკრედიტების მთლიან მოცულობაში ყველაზე დიდი ხვედრითი წილი - 45.8 პროცენტი ვაჭრობის სფეროზე მოდის.
როგორც "ჯი-ეიჩ-ენს" საქართველოს ეროვნული ბანკიდან ანცობეს, მიმდინარე წლის დასაწყისთან შედარებით ვაჭრობის სფეროზე გაცემული სესხების მოცულობა 0.4 პროცენტით ანუ 6.0 მლნ ლარით შემცირდა, თუმცა მთლიანობაში კვლავ 1.4 მლრდ ლარის დონეზე დარჩა.
მრეწველობაზე გაცემული სესხების წილი იურიდიულ პირებზე გაცემული ვადიანი სესხების საერთო მოცულობაში 22.1 პროცენტს შეადგენს, რაც 2010 წლის 1-ლი თებერვლისათვის 656.2 მლნ ლარით განისაზღვრა (2.9 პროცენტით ანუ 19.8 მლნ ლარით ნაკლები წინა თვესთან შედარებით); 11.7 პროცენტი მოდის მშენებლობაზე, რაც 348.0 მლნ ლარია (2.0 პროცენტით ანუ 6.8 მლნ ლარით მეტი, შესაბამისად). ამდენად, იურიდიული პირების დაკრედიტების საერთო მოცულობის 79.6 პროცენტი მხოლოდ სამ დარგზე - მრეწველობაზე, მშენებლობასა და ვაჭრობაზე მოდის.
ცნობისთვის, კომერციული ბანკების საკრედიტო დაბანდების მოცულობა (არარეზიდენტებზე გაცემული სესხების ჩათვლით), მიმდინარე წლის 1-ლი თებერვლის მდგომარეობით, წინა თვესთან შედარებით, 1.1 პროცენტით გაიზარდა და 5.2 მლრდ ლარს გადააჭარბა.
