24 ოქტომბერს, გაეროს დღე აღინიშნება. აღნიშნულთან დაკავშირებით გაეროს გენერალური მდივანი პან გი მუნი სპეციალურ მიმართვას ავრცელებს.
მიმართვაში ორგანიზაციის მიერ გაწეული საქმიანობაა შეჯამებული და ნათქვამია, რომ "გაერო ამ დღეს, ისევე როგორც ყოველდღიურად წლის განმავლობაში, იღვწის პლანეტის ყველა მშრომელისა და ყველა ხალხის საკეთილდღეოდ".
"ჩვენ სხვებზე მეტს ვანაწილებთ ჰუმანიტარულ დახმარებას, ამასთან ყველაზე მიუდგომელ და საშიშ ადგილებში. ჩვენ ვაქცინაციას ვუტარებთ მსოფლიოს ბავშვების 40 პროცენტს. 100 მილიონზე მეტ ადამიანს ვუწევთ სასურსათო დახმარებას; ვეხმარებით 30 მილიონზე მეტ ლტოლვილს, რომელთა უმრავლესობა ბავშვები და ქალებია და ცდილობენ თავი დააღწიონ ომსა და დევნას. სხვადასხვა ქვეყნებში ჩვენი ვაგზავნით უფრო მეტ მშვიდობისმყოფელებს, ვიდრე ოდესმე ყოფილა და ამჟამად მათი რიცხვი 115 000 ადამიანს აჭარბებს. მარტო გასულ წელს ჩვენ დახმარება აღმოვუჩინეთ 50 ქვეყანას არჩევნების ჩატარებაში. გაეროს მთელი სისტემა მობილიზებულია გლობალური ეკონომიკური კრიზისის დასაძლევად და მოსალოდნელი სოციალური რყევების თავიდან ასაცილებლად", - ნათქვამია მიმართვაში.
მასში ასევე აღნიშნულია, რომ გაერთიანებული ერების ორგანიზაციას ხალხი "მიიჩნევს ორგანიზაციად, რომელიც ებრძვის სიღარიბესა და შიმშილს, ამყარებს მშვიდობას, ავრცელებს განათლებას და იცავს ადამიანის უფლებებს მსოფლიოს ყველა კუთხეში."
"ისინი იმედით მოელიან ჩვენგან მასობრივი სასიკვდილო იარაღისა და დაავადებების გავრცელების შეჩერებას და ბუნებრივი კატასტროფების შედეგად დაზარალებული ხალხისა და ოჯახების დახმარებას. არის დიდი მოლოდინი იმისა, რომ დეკემბერში გაერო შეძლებს ყოვლისმომცვლელი, სამართლიანი და გადამჭრელი გადაწყვეტილების მიღებას კლიმატის ცვლილების პრობლემაზე, რომელიც დაგვიცავს და გზას გაუხსნის ეკოლოგიურად უფრო უსაფრთხო და მდგრად ეკონომიკას. დადგა მნიშვნელოვანი მომენტი მსოფლიო პრობლემების გადაწყვეტის საქმეში. ურიცხვმა კრიზისებმა - სასურსათო, საწვავის, ფინანსურმა, აგრეთვე გრიპმა - ერთად შემოგვიტია. კლიმატის ცვლილება ყოველდღიურად უფრო საშიშ მასშტაბს იღებს. ყოველი ჩვენგანისთვის ცხადი ხდება XXI საუკუნის ჭეშმარიტება: ჩვენ ვცხოვრობთ ერთ პლანეტაზე, ერთ სახლში. როგორც ხალხები, როგორც ერები, როგორც ბიოლოგიური სახეობა ჩვენ ან დავიღუპებით, ან გადავრჩებით ყველანი ერთად", - აღნიშნულია გაეროს გენმდივნის მიმართვაში.
ამასთან, პან გი მუნის შეფასებით, გაერო არ იშურებს ძალისხმევას, რათა მოაგვაროს არსებული რთული პრობლემები და უფრო ფართოდ შეხედოს სამყაროს.
"ჩვენ ვაყალიბებთ მრავალმხრივობისადმი ახლებურ მიდგომას, რომელსაც შეუძლია მოუტანოს ხალხს რეალური შედეგები, განსაკუთრებით კი მათ, ვისაც ეს ყველაზე მეტად ესაჭიროება. მაგრამ ამავდროულად სამწუხაროდ მესმის, რომ არსებობს დიდი სხვაობა დაპირებებსა და რეალურად გადადგმულ ნაბიჯებს შორის", - აღნიშნულის მიმართვაში.