საქართველოს პარლამენტის თავამჯდომარის, დავით ბაქრაძის შეფასებით, "რუსეთის ხელისუფლებას კვლავ 200 წლის წინანდელი იმპერიული აზროვნება აქვს".
ეს განცხადება ბაქრაძემ ჟურნალისტებთან საუბრისას დუმის მიერ "აფხაზეთის რუსეთის შემადგენლობაში შესვლის 200 წლის იუბილესთან" დაკავშირებით მიღებული განცხადების კომენტარისას გააკეთა.
როგორც ბაქრაძე აცხადებს, რუსეთის იმპერიული აზროვნება განსაკუთრებით საშიშია იმ თვალსაზრისით, რომ მოსკოვს ეს დამოკიდებულება აქვს არა მხოლოდ აფხაზეთთან, არამედ მთლიანად საქართველოსთან მიმართებაში.
"სამწუხაროა, რომ XXI საუკუნეში, ნაცვლად იმისა, რომ იფიქრონ ნორმალური ურთიერთობების დამყარებაზე, ჩვენი რუსი კოლეგები 200 წლის წინანდელი კრიტერიუმებით აზროვნებენ", - განაცხადა ბაქრაძემ.
რაც შეეხება აფხაზეთში გაერთიანებული რუსული სამხედო ბაზის შესაძლო ამოქმედებას, რომლის შესახებაც დიმიტრი მედვედევმა და სერგეი ბაღაფშმა ხელშეკრულება დღეს გააფორმეს, ბაქრაძის შეფასებით, უკანონოა.
"რუსული შეიარაღებული ძალები საქართველოს ტერიტორიაზე უკანონოდ და საერთაშორისო სამართლის დარღევით იმყოფებიან, ამიტომ ნებისმიერი დოკუმენტი, რომლითაც რუსეთი ამ უკანონობის ლეგიტიმაციას ეცდება, უკანონოა. რუსეთი მუდმივად ცდილობს აფხაზეთსა და ე. წ. სამხრეთ ოსეთს სახელმწიფოებრივი ატრიბუტიკა შესძინოს და სეპარატისტულ რეგიონებთან ნებისმიერი დოკუმენტის გაფორმება სწორედ ამ კონტექსტში მოიაზრება. საერთაშორისო სამართალი აფხაზეთს საქართველოს ნაწილად აღიარებს და ამიტომ მოსკოვსა და სოხუმს შორის გაფორმებული ხელშეკრულებები ვერანაირად ვერ იქნება კანონიერი და ვერც რაიმე დოკუმენტის ძალა ექნება", - განმარტავს პარლამენტის თავმჯდომარე.