იაპონური კინოს ფესტივალი 14 თებერვლამდე გასტანს და მას მოჰყვება 15 თებერვალს რუსთაველის თეატრში იაპონელი ჯაზ-პიანისტის ჰირომი უეჰარას კონცერტი, რომელიც „თაგის არტსის" და საქართველოს საზოგადოებრივი მაუწყებლის მიერ არის ორგანიზებული,

თბილისის მერიის მხარდაჭერით. ფესტივალის გახსნაზე სიტყვებითYგამოვლენ იაპონიის საგანგებო და სრულუფლებიანი ელჩი საქართველოში მასაიოში კამოჰარა და თბილისის მერიის წარმომადგენლები.

იაპონური ფილმები ნაჩვენები იქნება 8 თებერვლიდან 14 თებერვლის ჩათვლით, დღეში სამჯერ, კინოთეატრ „რუსთაველის" მცირე დარბაზში (დარბაზი # 2). სეანსებზე დასწრება თავისუფალია.

ფესტივალის ფარგლებში ნაჩვენები იქნება ოთხი ფილმი: სახელგანთქმული რეჟისორის აკირა კუროსავას „ცუბაკი სანჯურო" (1962 წ.) _ შავ-თეთრი ფილმი სამურაების ცხოვრებაზე 19-საუკუნის იაპონიაში.

რეჟისორ დაისუკე ტენგანის „აიკი" (2002 წ.) _ ფილმი ახალგაზდრა მამაკაცის შესახებ, რომელმაც დასძლია ცხოვრებისეული სირთულეები უძველესი იაპონური საბრძოლო ხელოვნების - აიკიდოს მეშვეობით.

რეჟისორ იოიჩი ჰიგაშის (1996 წელს ბერლინის 46-ე კინოფესტივალის ვერცხლის დათვის მფლობელი ფილმისთვის „ოცნებების სოფელი") „პაპაჩემი" (2003 წ.), _ რომლის მთავარი გმირი კენზო 13 წლის პატიმრობის შემდეგ ციხიდან გამოდის, მაგრამ მისი შვილიშვილი ტომაკო ძნელად ეგუება პაპამისს, „სამაგიეროდ" მის დაბრუნებას მოუთმენლად ელის იაკუძას კლანის ბოსი...

ცნობილი მულტიპლიკატორის ოსამუ ტეძუკას ორი ანიმე (მულტფილმი): „ასტრო ბოი" (1981 წ.) _ სათავგადასავლო მულტფილმი ზებუნებრივი ძალის მქონე რობოტ ბიჭუნაზე და „ტყის ლეგენდა" (1987 წ.) ჩაიკოვსკის მუსიკით შთაგონებული მომაჯადოებელი ზღაპარი, რომელშიც არის ყველაფერი _ მოლაპარაკე ცხოველებით დაწყებული და კეთილი ფერიებით დამთავრებული.

ფილმები წარმოდგენილი იქნება იაპონურ ენაზე რუსული სუბტიტრებით.