საქართველოს საგარეო საქმეთა სამინისტრო იმედს გამოთქვამს, რომ ტირძნისელი ბავშვების გათავისუფლების თაობაზე საოკუპაციო რეჟიმი საკუთარ პირობას შეასრულებს.
"იმედია ბავშვები დღეს გათავისუფლდებიან და ის ტექნიკური მიზეზები, რომლებიც ამ პროცესის გაჭიანურების მიზეზად იქნა დასახელებული, სიმართლეს შეესაბამება", - განაცხადა საგარეო უწყების ხელმძღვანელის მოადგილე ნინო კალანდაძემ დღეს გამართულ, ორშაბათის ტრადიციულ პრესკონფერენციაზე.
ამასთან, მინისტრის მოადგილე კიდევ ერთხელ განმარტავს, რომ მოზარდები უპირობოდ უნდა გათავისუფლდნენ, რადგან მათი დაკავება უკანონოდ მოხდა.
"ბავშვები უპირობოდ უნდა გათავისუფლდნენ და ამისთვის არანაირ პირობაზე არ შეიძლება იყოს საუბარი. მოზარდების გათავისუფლების სანაცვლოდ ნებისმიერი პირობის წამოყენება ჩვენს მიერ შანტაჟად იქნება შეფასებული", - განმარტა მან.
შეგახსენებთ, რომ დღეს იწურება ვადა, რომელშიც საოკუპაციო რეჟიმმა ტირძნისელი მოზარდების გათავისუფლების პირობა დადო. ქართული მხარე ბავშვების გამოშვებას დღეს საღამომდე ელოდება.