ოზურგეთის საკოლმეურნეო ბაზრის მოვაჭრეებმა ამ დილით ოზურგეთის სარკინიგზო მაგისტრალი 1 საათით გადაკეტეს, რითაც,,თბილისი-ოზურგეთის" ჩქაროსნული მატარებელს გასვლის საშუალება არ მისცეს.
100-მდე მოვაჭრე დღემდე მოქმედ აგრარულ ბაზარში ეკონომიკური საქმიანობის შეწყვეტასა და ახალ, ევროსტანდარტების დონის სავაჭრო ცენტრში გადასვლას აპროტესტებდა.
მათი თქმით, ადგილობრივ ხელისუფლებას არ ქონდა ძველი ბაზრის დემონტაჟის დაწყების უფლება. მოვაჭრეები აცხადებენ, რომ მათ არ უნდათ ახალ სავაჭრო ცენტრში გადასვლა, რადგან შესაძლოა ახალ სავაჭრო ცენტრში ისინი უადგილოდ დარჩნენ ან მათ მოსაკრებელი გაეზარდოთ.
სავაჭრო ცენტრის დირექტორის, ირაკლი სირაძის განცხადებით, ცენტრი ყველა მოვაჭრეს სრულად დაიტევს და მათ ზუსტად იმ ოდენობის მოსაკრებლის გადახდა მოუწევთ, რასაც აქამდე იხდიდნენ.
ოზურგეთის მუნიციპალიტეტის გამგებლის, ავთანდილ მექვაბიშვილის განცხადებით, ადგილობრივმა ხელისუფლებამ ძველი აგრარული ბაზრის საქმიანობის შეჩერების შესახებ გადაწყვეტილება სოფლის მეურნეობის სამინისტროს სურსათის უვნებლობის სამსახურის უარყოფით დასკვნის საფუძველზე მას შემდეგ მიიღო, რაც მათთვის უკეთესი ალტერნატივის შეთავაზების საშუალება მიეცა.
მისი თქმით, მუნიციპალიტეტის მიეგრ განხორციელებული ყველა პროცედურა კანონთან სრულად არის შესაბამისობაში, მოვაჭრეთა უმრავლესობა უკვე ახალ ბაზარში საქმიანობს და ისინი კმაყოფილებას გამოთქვამენ იქ არსებული პირობებით.მოპიკეტეეებს კი, რომლებშიც ადგილობრივი გლეხები არ არიან, ოპოზიციური ძალები მართავენ.
