აშშ რუსეთს შეუსრულებელ ვალდებულებებს ახსენებს. აშშ-ის სახელმწიფო მდივნის მოადგილის ფილიპ გორდონის განცხადებით, კრემლის მიერ აფხაზეთისა და ე.წ. სამხრეთ ოსეთის აღიარება უკანონოა და ვაშინგტონი მას მხარს არასდროს დაუჭერს.
საგარეო ურთიერთობათა საბჭოში გამოსვლისას გორდონმა საქართველოს ტერიტორიული მთლიანობისადმი მხარდაჭერაც დააფიქსირა და განმარტა, რომ ამერიკასა და რუსეთს შორის უთანხმოების მთავარი თემა ისევ საქართველოა.
"შტატები რუსეთზე ზეწოლას გააგრძელებს და ოკუპირებულ რეგიონებში ჰუმანიტარული კორიდორების გახსნას მოითხოვს. რუსეთის ვეტოს შედეგად აფხაზეთსა და სამხრეთ ოსეთში ეუთოს მისია დაიბლოკა. კრემლის პოლიტიკის გამო არ მუშაობს გაეროს მანდატიც. ამიტომ ამერიკა ცდილობს ჟენევის მოლაპარაკებათა ფორმატში ახალი მექანიზმები მოძებნოს და საქართველოს ამ გზით დაეხმაროს. თავად საქართველომ კი უნდა გააგრძელოს დემოკრატიული განვითარება და ევროსტრუქტურებთან ინტეგრაციის პროცესი", - განაცხადა ფილიპ გორდონმა.