რუსეთის ფედერაციის პრეზიდენტის დიმიტრი მედვედევის მტკიცებით, მას "არასდროს უთხოვია და არ ითხოვს სხვა სახელმწიფოებისგან სოხუმისა და ცხინვალის აღიარებას".
"ეს არ არის ჩემი საქმე. ეს სხვა სახელმწიფოების საქმეა. არც საჯარო განზომილებაში, არც პირადი შეხვედრებისას არასდროს მითხოვია არც ბელორუსის ლიდერისთვის დ არც სხვა ბელორუსი თანამდებობის პირისთვის აფხაზეთისა და სამხრეთ ოსეთის აღიარება. არ მიმიმართავს მათთვის არც პირდაპირ, არც ირიბად", - ამის შესახებ მედვედევმა კრემლში ბეროლუს ჟურნალისტებთან შეხვედრისას განაცხადა.
მისივე განმარტებით, თავად ალექსანდ ლუკაშენკოს არაერთხელ განუცხადებია, რომ "ბელორუსი აუცილებლად განიხილავს ამ საკითხს და ალბათ აღიარებს ახალ რესპუბლიკებს".
ამასთან, რუსეთის პირველი პირის თქმით, ყველანაირი საუბარი სოხუმისა და ცხინვალის სუვერენიტეტის აღიარებასთან დაკავშირებით რუსეთის თხოვნაზე "თითიდანაა გამოწოვილი" და პროვოკაციულ ხასიათს ატარებს.
გარდა ამისა, მედვედევმა ისიც აღნიშნა, რომ თავად მოსკოვისთვის ამ ორი ქვეყნის აღიარება "ძალიან ძნელი არჩევანი" იყო.
"ის გაკეთდა მხოლოდ მას შემდეგ, რაც საქართველომ ორი ტერიტორიის წინააღმდეგ აგრესია განახორცილა, გაკეთდა, რათა დაცულიყვნენ მოქალაქეები, რომლებიც იქ ცხოვრობენ, მათ შორის რუსები და რათა მომავალში აღკვეთილიყო ასეთი სახის კონფლიქტები", - განაცხადა დიმიტრი მედვედევმა.
რუსეთის პრეზიდენტმა არც ის დამალა, რომ რუსეთისთვის უკეთესი იქნებოდა ახალ სუბიექტებს მეტი აღიარება რომ მიეღოთ.
"ამ შემთხვევაში ახალი სახელმწიფოებისთვის ადვილი იქნებოდა განვითარება, მაგრამ ჩვენ არასდროს ვერევით და არც ვცდილობთ ვიყოთ პროცესის მესაჭეები. ეს ეწინააღმდეგება საერთაშორისო სამართლის პრინციპებს", - განაცხადა რუსეთის ლიდერმა.