რუსეთში აშშ-ს ელჩი უარყოფს გავრცელებულ ინფორმაციას იმის შესახებ, თითქოს ვაშინგტონი საქართველოს იარაღით ამარაგებს.
ამის შესახებ ჯონ ბაიერლიმ "როსიისკაია გაზეტასთვის" მიცემულ ინტერვიუში განაცხადა. მისი თქმით, ვაშინგტონი არ აწვდის და არც გეგმავს თბილისისთვის იარაღის მიწოდებას.
კავკასიაში არსებულ ვითარებასთან დაკავშირებით საუბრისას ბაიერლიმ განაცხადა, რომ აშშ აქტიურად მუშაობს რუს და ევროპელ პარტნიორებთან რეგიონში სიმშვიდის უზრუნველსაყოფად.
"ვაშინგტონს სურს საერთაშორისო დამკვირვებლების დაბრუნება აფხაზეთსა და ე.წ სამხრეთ ოსეთში", - აცხადებს ელჩი.
შეგახსენებთ, რომ რუსეთის შეიარაღებული ძალების გენერალური შტაბის უფროსმა, ნიკოლაი მაკაროვმა რამდენიმე კვირის წინ განაცხადა, რომ საქართველოში აშშ-დან იარაღი ინტენსიურად შედის.