ჟურნალისტი მანანა მანჯგალაძე პრეზიდენტის ადმინისტრაციის პრესსამსახურის უფროსის პოსტზე მუშაობას ოფიციალურად დღეიდან შეუდგება. ამის შესახებ "ჯი-ეიჩ-ენს" პრეზიდენტის ადმინისტრაციის პრესსამსახურში განუცხადეს.
საქართველოს პრეზიდენტმა მისი ადმინისტრაციის პრეს-სპიკერად მანანა მანჯგალაძე ოფიციალურად გუშინ, 23 ნოემბერს, წარადგინა.
როგორც მიხეილ სააკაშვილმა განაცხადა, ის მოხარულია, რომ მანანა მანჯგალაძე მასთან თანამშრომლობას დათანხმდა.
"მინდა წარმოგიდგინოთ პრეზიდენტის ადმინისტრაციის ახალი პრეს-სპიკერი - მანანა მანჯგალაძე. მანანა და მე დიდი ხანია ვიცნობთ და ვთანამშრომლობთ ერთმანეთთან და ეს ერთ-ერთი ყველაზე საინტერესო ჟურნალისტია. ჩემთვის დიდი პატივია, რომ ის დათანხმდა იმას, რომ თქვენ, დანარჩენ საქართველოს და მსოფლიოს შეატყობინოს საქართველოს პრეზიდენტის პოზიცია. ეს არის რთული სამუშაო, მაგრამ ჩათვალეთ, რომ დღეიდან, როცა მანანა ლაპარაკობს, ლაპარაკობს საქართველოს პრეზიდენტი. ასე რომ, ყველაზე ჭკვიანურ აზრებს ამიერიდან ამ ადამიანისგან გაიგებთ", - განაცხადა პრეზიდენტმა გორში პოლიციის ახალი შენობის გახსნისას.
შეგახსენებთ, რომ მანანა მანჯგალაძე ტელეკომპანია "იმედში", საინფორმაციო გამოშვება "ქრონიკის" წამყვანად მუშაობდა. პრეზიდენტის ადმინისტრაციის პრესსამსახურის უფროსის თანამდებობა კი ვაკანტური რამდენიმე კვირის წინ, მას შემდეგ გახდა, რაც ვანო ნონიაშვილი აზერბაიჯანში საქართველოს ელჩად დაინიშნა.
