"ქართული დასი" სასოფლო-სამეურნეო მიწებზე საგადასახადო შეღავათების დაწესებას ითხოვს.
როგორც დღეს გამართულ ბრიფინგზე "დასის" ლიდერმა ჯონდი ბაღათურიამ აღნიშნა, სოფლის მეურნეობის განვითარების გრძელვადიან პროგრამაზე მისმა პარტიამ უკვე დაიწყო მუშაობა.
აღნიშნული ითვალისწინებს სახნავ-სათესი მიწის ფონდის ინვენტარიზაციის ანალიზს, კერძოდ კი რამდენია ათვისებული და რამდენი აუთვისებელი, ასევე რა კულტურები ითესება უკვე ათვისებულ მიწებზე, რა ხარისხის სათესლე მასალაა, რა მდგომარეობაშია მელიორაციის სისტემები და დამატებით რა ჰიდროტექნიკური ნაგებობების მოწყობაა საჭირო.
"მიმდინარე წლის ბიუჯეტში სოფლის მეურნეობის განვითარების პროგრამებისთვის 280 მილიონი ლარი გამოიყო, თუმცა ეს ფული სოფლებში სტადიონების, შადრევნების და სხვა გასართობი ინფრასტრუქტურის მოწყობისთვის დაიხარჯა, რომლის შედეგადაც სავალალო მდგომარეობა მივიღეთ - ქართულ ბაზარზე ადგილობრივი წამოება იაფასიანმა, ხშირ შემთხვევაში გენმოდიფიცირებულმა პროდუქციამ ჩაანაცვალა", - აღნიშნა ბაღათურიამ.
მისივე თქმით, სოფლის მეურნეობის სფეროში ისედაც დამძიმებულ ვითარებას ისიც ემატება, რომ ხელისუფლების მიერ მიწის ქონების გადასახადით დაბეგვრის მუქარამ სასოფლო-სამეურნეო მიწების გაიაფება გამოიწვია. ეს შედეგია იმისა, რომ უცხოურ მედიაში გავრცელდა ინფორმაცია, საქართველოში მიწების იაფად გაყიდვის შესახებ.
ოპოზიციონერი დეპუტატის განმარტებით, ქართველი გლეხის მიწას სამხრეთ აფრიკელი ფერმები ყიდულობენ, რასაც საბოლოოდ გლეხების მამა-პაპისეული მიწებიდან აყრა მოხდება.
"ჩვენ არავის საწინააღმდეგო არ გვაქვს, მაგრამ თუ სახელმწიფოს მხრიდან შესაბამისი ხელშეწყობა იქნება ქართველი გლეხის მიმართ, სოფლის მეურნეობა გახდება ქართული ეკონომიკის ხერხემალი და საქართველოს ყველა მოქალაქის დამსაქმებელი. ამის გათვალისწინებით საგაზაფხულო სესიისთვის ჩვენ შევიმუშავებთ კანონპროექტს, რომელიც სოფლის მეურნეობის განვითარების გრძელვადიან პროგრამაზე იქნება გათვლილი", - აღნიშნა ბაღათურიამ.
მისივე თქმით, კანონპროექტში ასევე გათვალისწინებული იქნება მეცხოველეობა, მეფრინველეობის და ვეტერინარიის განვითარების საკითხებიც.