კვირის ბოლომდე ქობულეთის ტურისტულ ზონაში ასაშენებელი სასტუმროების ინვესტორების ვინაობა გახდება ცნობილი.
ამის შესახებ განცხადება დღეს ეკონომიკისა და მდგრადი განვითარების მინისტრმა ვერა ქობალიამ სამთავრობო კომისიის სხდომის დაწყების წინ გააკეთა. სხდომაზე პროექტის ფარგლებში მონაწილე კომპანიების პროექტების განხილვა მიმდინარეობს, რამდენიმე პროექტის განხილვა და დამტკიცება დღესვე მოხდება.
"სხდომაზე განვიხილავთ იმ პროექტებს, რომელიც შემოვიდა ტურისტულ ზონასთან დაკავშირებით. სულ შემოსულია 52 პროექტი და დღეს დამტკიცდება ის პროექტები, რომლებსაც აქვს საშუალება, რომ სასტუმროების მშენებლობა მიმდინარე თვის ბოლომდე დაიწყონ. 52 კომპანიიდან უმეტესობა არის ქართული კომპანიები. აღსანიშნავია, რომ ამ ქართული კომპანიებიდან უშუალოდ ქობულეთური კომპანიებიც არიან" - განაცხადა ქობალიამ.
მინისტრის თქმით, სამშენებლო სამუშაოებზე 1000 ადამიანი დასაქმდება, ხოლო სასტუმროების მშენებლობების დასრულების შემდეგ ამ სასტუმროებში მუდმივად ათასი ადამიანი დასაქმდება.
როგორც ქობალიამ აღნიშნა, პროექტში მონაწილე კომპანიების ვინაობა კვირის ბოლომდე გახდება ცნობილი. ინვესტორები, რომლებიც ქობულეთის ტურისტულ ზონაში სასტუმროებს ააშენებენ და პირობებს დაიცავენ, სახელმწიფოსგან ყველა იმ შეღავათებით ისარგებლებენ, რომელიც ადრე იყო გახმოვანებული.
შეგახსენებთ, რომ ქობულეთში "თავისუფალი ტურისტული ზონის" განვითარების მიზნით, ე.წ "ფიჭვნარის" ტერიტორიზე, ზღვიდან 140 მ-ის დაშორებით, ახალი სასტუმროების მშენებლბისთვის მთავრობამ პოტენციურ ინვესტორებს განსხვავებული შეღავათები შესთავაზა.
პროექტის თანახმად, ე.წ "ფიჭვნარის" ტერიტორიზე, გამოყოფილია მიწის 3 ნაკვეთი (საერთო ფართით 11,3 ჰა), რომლებზედაც დაგეგმილია 27 სასტუმრო კორპუსის მშენებლობა. განსაზღვრულია სასტუმრო კორპუსების 3 ტიპი. მშენებლობის მსურველს შეუძლია არჩევანი გააკეთოს.
ასევე, განსაზღვრულია, სასტუმრო კორპუსების სართულიანობაც: 5, 6 ან 7 სართული (42, 52 ან 60 ნომერი).
პროექტის თანახმად, სამშენებლო მიწის ნაკვეთის განკარგვა განხორციელდება სიმბოლურ ფასად, დამტკიცებული საპროექტო-სამშენებლო დოკუმენტაცია დამკვეთს გადაეცემა უსასყიდლოდ. ტერიტორია უზრუნველყოფილი იქნება საინჟინრო-კომუნალური ქსელებით და სათანადო ინფრასტრუქტურით.
იმ შემთხვევაში, თუ მშენებლობა დამთავრდება და ობიექტი ექსპლუატაციაში შევა 2011 წლის 1 აგვისტომდე, ინვესტორი 15 წლით მოგებისა და ქონების გადასახადებისაგან გათავისუფლდება.