ქობულეთის თავისუფალ ტურისტულ ზონაში სასტუმრო ობიექტის მშენებლობის სურვილი იმაზე მეტმა ადამიანმა გამოთქვა, ვიდრე მთავრობა ამას წინასწარ ვარაუდობდა.
ამის შესახებ განაცხადა მთავრობის საპარლამენტო მდივანმა გია ხუროშვილმა პარლამენტის საფინანსო-საბიუჯეტო კომიტეტის სხდომაზე, სადაც მთავრობის მიერ ინიცირებული კანონპროექტი პირველი მოსმენით განიხილეს.
კანონპროექტის თანახმად, იმ პირებს, ვინც ქობულეთის ტურისტულ ზონაში მინიმუმ 1 მილიონის ლარის ინვესტიციას განახორციელებს, სიმბოლურ ფასად - 1 ლარად მიიღებს მიწის ნაკვეთს.
ასევე ხელისუფლება ობიექტზე მოაწყობს საკომუნიკაციო ინფრასტრუქტიურას და 15 წლის განმავლობაში გათავისუფლდება მოგების და ქონების გადასახადისგან.
აღსანიშნავია, რომ საფინანსო-საბიუჯეტო კომიტეტი მთავრობის ამ ინიციატივას დადებითად აფასებს და მხარს ყოველგვარი შენიშვნის გარეშე უჭერს.
საპარლამენტო უმრავლესობის წარმომადგენელმა ელდარ კვერნაძემ ისიც კი განაცხადა, ეს პროექტი იმდენად კარგია, სხვა ქვეყნებიც უსათუოდ გადაიღებენო.