გარემოს დაცვისა და ბუნებრივი რესურსების სამინისტროში მომსახურების ცენტრის პრეზენტაცია გაიმართა, რომელიც მინისტრმა გოგა ხაჩიძემ გახსნა.
საინფორმაციო ცენტრში გარემოს დაცვის სამინისტროს საჯარო სამართლის იურიდიული პირების - სატყეო სააგენტოს, გარემოს დაცვის ინსპექციის, დაცული ტერიტორიების სააგენტოს და გარემოს ეროვნული სააგენტოს წარმომადგენლები საქართველოს ნებისმიერ მოქალაქეს მათთვის საინტერესო გარემოს დაცვით საკითხებში კონსულტაციას გაუწევენ.
„გარემოს დაცვის სამინისტროში ძალიან ბევრი სამსახურია. ნებისმიერი ინფორმაცია, რომელიც ჩვენს სამინისტროს ეხება და მომსახურება, რომელსაც ჩვენ ვუწებთ მოქალაქეებს, თავმოყრილი იქნება მომსახურების ცენტრში, რომ ადამიანებს გავუმარტივოთ ინფორმაციის მიღება. დაინტერესებულ პირს შეუძლია მობრძანდეს და მიიიღოს მისთვის საჭირო ყველა ტიპის ინფორმაცია, რაც ჩვენს სამინისტროში შეიძლება არსებობდეს. ეს არის პირველი პრაქტიკული ნაბიჯი „ერთი ფანჯრის" პრინციპისკენ. მსგავსი ოფისები მომავალში რეგიონებშიც გაიხსნება. ჩვენი მიზანია, რომ მომხმარებლისთვის ინფორმაცია იყოს გასაგები და ხელმისაწვდომი," განაცხადა გოგა ხაჩიძემ.
ხაჩიძის განმარტებით, ცენტრი მოქალაქეებს მოემსახურება გარემოს დაცვის სამინისტროს საქმიანობის, დაცული ტერიტორიების სერვისების, შეშით უზრუნველყოფის, გარემოსდაცვითი კანონმდებლობის, ლიცენზიების და ნებართვების, გარემოს მდგომარეობის, ბიომრავალფეროვნების შესახებ ობიექტური ინფორმაციის მიწოდებაში. საკონსულტაციო ცენტრი ხელს შეუწყობს გარემოს დაცვის სამინისტროს მიერ საზოგადოებისთვის გარემოსდაცვითი ინფორმაციის ხელმისაწვდომობას და მომსახურების გაუმჯობესებას.
დაინტერესებულ პირებს ინფორმაციის მიღება ყოველ სამუშაო დღეს 10 საათიდან 7 საათამდე შეეძლებათ. ასევე, ცენტრში სამინისტროს 24 საათიანი ცხელი ხაზი - 070 იმუშავებს, სადაც ოპორატორები თითოეულ ზარზე დაუყობნებლივ რეაგირებას ახდენენ. ზარის განხორციელება უფასოა.
გარემოს დაცვის სამინისტროს მომსახურების ცენტრები ეტაპობრივად საქართველოს ყველა რეგიონში გაიხსნება.