დიდმა ბრიტანეთმა, საფრანგეთმა და გერმანიამ, კორონავირუსთან საბრძოლველად, ირანს სამედიცინო აღჭურვილობა გაუგზავნეს. იუწყება BBC-ი.
გავრცელებული ცნობით, ირანისთვის სამედიცინო აღჭურვილობის გაგზავნა სპეციალური სავაჭრო მექანიზმით განხორციელდა, რათა არ დარღვეულიყო შეერთებული შტატების მიერ დაწესებული სანქციები.
სამედიცინო ტვირთის გაგზავნასთან დაკავშირებით ინფორმაცია გერმანიის საგარეო საქმეთა სამინისტრომ გაავრცელა.
"საფრანგეთი, გერმანია და გაერთიანებული სამეფო ადასტურებენ, რომ INSTEX-ის მეშვეობით, წარმატებით განხორციელდა პირველი ტრანზაქცია, რაც ხელს უწყობს სამედიცინო საქონლის ექსპორტს ევროპიდან ირანში. INSTEX-ი და მისი ირანელი პარტნიორი STFI იმუშავებენ ამ მექანიზმის გაძლიერებასა და შემდგომ ტრანზაქციებზე", - აღნიშნული სამინისტროს განცხადებაში.
31 მარტის მონაცემებით, ირანში კორონავირუსით ინფიცირების 44 606 შემთხვევაა გამოვლენილი. გარდაიცვალა 3110 პაციენტი.
