საქართველოს მთავრობამ ამერიკის შეერთებულ შტატებში მოქმედ ლობისტურ კომპანია Strate Various-თან ხელშეკრულება განაახლა. შესაბამისი ინფორმაცია აშშ-ის იუსტიციის დეპარტამენტის ვებგვერდზე გამოქვეყნდა.
გაფორმებულ ხელშეკრულებას მთავრობის სახელით ხელს მთავრობის ადმინისტრაციის უფროსი ნათია მეზვრიშვილი აწერს.
"დამკვეთი ქირაობს ფირმას, რომელიც დაეხმარება დამკვეთს, აშშ-საქართველოს ორმხრივი ურთიერთობების განმტკიცების, ორმხრივი ვაჭრობის გაფართოებისა და აშშ-დან პირდაპირი უცხოური ინვესტიციების მოზიდვის, ასევე მედიასა და გავლენიან წრეებთან ურთიერთობების, შესაბამისი ღონისძიებებისა და შეხვედრების მხარდაჭერისა და საქართველოში მიმდინარე მოვლენებზე აშშ-ის ლიდერების ინფორმირების კუთხით", - ვკითხულობთ ხელშეკრულებაში.
გაწეული მომსახურების სანაცვლოდ საქართველოს მთავრობა კომპანიას თვეში 10 ათას დოლარს გადაუხდის. ხელშეკრულება ერთი წლით გახანგრძლივდა.
ცოტა ხნით ადრე, გავრცელდა ინფორმაცია, რომ საქართველოს მთავრობამ ლობისტურ კომპანია chartwell strategy group-თან ხელშეკრულება 2020 წლის 27 იანვარს განაახლა.
"დარეგისტრირებული პირი საქართველოს მთავრობას უზრუნველყოფს საზოგადოებასთან ურთიერთობებისა საკონსულტაციო მომსახურებით. იმუშავებს აშშ-ისა და საქართველოს ორმხრივი ურთიერთობების განმტკიცებისთვის.
მხარდაჭერას გაუწევს საქართველოს მთავრობას აშშ-ის ადმინისტრაციასთან და კონგრესთან კავშირების დამყარებასა და მხარდაჭერის მოპოვებაში. ასევე საქართველოს დაეხმარება უსაფრთხოების სფეროში აშშ-ის მხარდაჭერის გაძლიერებაში.
ითანამშრომლებს აშშ-ის ადმინისტრაციის ოფიციალურ პირებთან, საქართველოში აშშ-ის პირდაპირი ინვესტიციების საჭიროების საკითხზე და ორმხრივი სავაჭრო ურთიერთობების განვითარებაზე.
დარეგისტრირებული პირი კომუნიკაციას აწარმოებს აშშ-ისა და გლობალურ მედიასთან აშშ-ისა და საქართველოს ორმხრივ ურთიერთობებზე", - წერია მხარეებს შორის გაფორმებულ ლობისტური მომსახურების ხელშეკრულებაში.
