შეერთებული შტატების პრეზიდენტმა დონალდ ტრამპმა, სენატში იმპიჩმენტის პროცესის თავის სასარგებლოდ დასრულების შემდეგ, თეთრ სახლში საგანგებო ბრიფინგი გამართა.
სიტყვით გამოსვლისას თავისი პოლიტიკური ოპონენტები, დემოკრატიული პარტიის წარმომადგენლები ბოროტებად, ნენსი პელოსი კი "საშინელ ადამიანად" მოიხსენია.
დონალდ ტრამპმა არ გამორიცხა, რომ დემოკრატებმა შესაძლოა, მის წინააღმდეგ კვლავ წამოიწყონ იმპიჩმენტის პროცესი.
"ეს ადამიანები ბოროტები არიან. ისინი ერთად არიან და ბოროტები არიან როგორც ეშმაკები. შესაძლოა ისინი ისევ დაბრუნდნენ, რათა მიიღონ მეტი" - განაცხადა ტრამპმა დემოკრატებზე საუბრისას.
შეგახსენებთ, შეერთებული შტატების სენატმა პრეზიდენტი დონალდ ტრამპი წარმომადგენელთა პალატის მიერ წარდგენილი ორივე მუხლით გაამართლა და უდანაშაულოდ ცნო.
სენატორებმა ბრალდების ორივე მუხლი ხმათა უმრავლესობით უარყვეს: ძალაუფლების ბოროტად გამოყენება და კონგრესის მიერ ჩატარებული გამოძიების ხელის შეშლა.
ტრამპის წინააღმდეგ ერთადერთმა რესპუბლიკელმა, გავლენიანმა სენატორმა მიტ რომნიმ მისცა ხმა. კენჭისყრამდე რამდენიმე საათით ადრე მან განაცხადა, რომ დონალდ ტრამპმა შეუფასებელი ზიანი მიაყენა პრეზიდენტის ფიცსა და ამერიკის კონსტიტუციას.
პრეზიდენტის დამნაშავედ ცნობას, სენატის შემადგენლობის 2/3-ის მხარდაჭერა, ანუ სულ მცირე 67 ხმა სჭირდებოდა.
იმპიჩმენტის პროცედურა სენატში ორი კვირის განმავლობაში მიმდინარეობდა.
ამერიკის ისტორიაში, ეს მესამე შემთხვევაა, როცა წარმომადგენელთა პალატამ პრეზიდენტის იმპიჩმენტის პროცესი წამოიწყო და ის სენატში განიხილეს.
პრეზიდენტ ტრამპის გამართლებას გამოეხმაურა წარმომადგენელთა პალატის სპიკერი, ნენსი პელოსი, რომელმაც განაცხადა, რომ რესპუბლიკელებმა ამერიკის კონსტიტუციას უღალატეს და ტრამპი კვლავაც საფრთხეს წარმოადგენს ამერიკის დემოკრატიისთვის.