ჯანდაცვის მინისტრმა ეკატერინე ტიკარაძემ „საპარტნიორო ფონდი“ გააკრიტიკა.
მისი თქმით, „საპარტნიორო ფონდმა“ ვერ შეძლო კლინიკების ეფექტიანი მართვა და ინვესტიციების მოზიდვა.
„საპარტნიორო ფონდს“ ჰქონდა გადაცმული კლინიკები, რათა მოეძიებინა ინვესტიციები და დაეწყო მისი ეფექტური მართვა, მაგრამ სამწუხაროდ ეს დღემდე ვერ მოხერხდა. აქედან გამომდინარე, ჩვენ მივიღეთ გადაწყვეტილება, ჩამოგვეყალიბებინა ჰოლდინგი და შესაბამისი მმართველი ჯგუფით ეფექტურად გვემართა საავადმყოფოები. ამ ეტაპზე ინვესტორთან მოლაპარაკებების საკითხი დახურულია. დარწმუნებულიო ვართ, ჩვენი რესურსით შევძლებთ რეინვესტირების განხორციელებას და მათი ინფრასტრუქტურის გაუმჯობესებას“, – განაცხადა მინისტრმა.
მინისტრის განცხადებას უპასუხა „საპარტნიორო ფონდის“ ხელმძღვანელმა დავით საგანელიძემ. მან მინისტრის ბრალდებას სამწუხარო უწოდა. „სწორედ ჯანდაცვის მინისტრად ქ-ნი ეკატერინე ტიკარაძის თანამდებობაზე დანიშვნის შემდეგ, ეს პროცესი შეჩერდა და პოტენციურ ინვესტორთან ურთიერთობაც ფონდმა ამის შემდეგ შეწყვიტა“, - წერია განცხადებაში, რომელიც საპარტნიორო ფონდმა გაავრცელა.