თბილისის საქალაქო სასამართლომ, ყოფილი მხედრიონელის, დოდო გუგეშაშვილის მკვლელობის მცდელობისა და მისი შვილის ნოდაერ გუგეშაშვილის განზრახ მკვლელობის საქმეზე დაკავებულ პირს აღკვეთი ღონისძიების სახით პატიმრობა შეეფარდა.
საქმის პროკურორის განცხადებით, საგამოძიებო უწყება მუშაობას ინტენსიურ რეჟიმში აგრძელებს - როგორც დამკვეთის, ასევე თავდასხმასთან სხვა პირების კავშირის შესახებ.
დაცვის მხარე სასამართლოს გადაწყვეტილებას არ ეთანხმება. დაკავებული ზაზა მურჯიკნელი ამბობს, რომ მას მომხდართან არაფერი კავშირი არ აქვს და ბრალს არ აღიარებს.
სამართალდამცველებმა მურჯიკნელი 24 იანვარს დააკავეს. შსს-ში გამართულ ბრიფინგზე თქვეს, რომ ბრალდებულის სახით 1975 წელს დაბადებული, წარსულში ნასამართლევი ზ.მ. დააკავეს. დანაშაული 16-დან 20 წლამდე ან უვადო თავისუფლების აღკვეთას ითვალისწინებს.
გამოძიებით დადგინდა, რომ ბრალდებულმა 2018 წლის 7 თებერვალს, თბილისში, დოდო გუგეშაშვილის დროებით საცხოვრებელ სახლში, ცეცხლსასროლი იარაღიდან გასროლით გულმკერდის არეში სხეულზე დაზიანებები მიაყენა დოდო გუგეშაშვილს და მის შვილს - გრიგოლ გუგეშაშვილს, რომელიც მიღებული დაზიანებების შედეგად ადგილზე გარდაიცვალა. თავად დოდო გუგეშაშვილი, დროული სამედიცინო დახმარების შედეგად, სიკვდილს გადაურჩა.
განზრახ მკვლელობისა და ორი ან მეტი პირის მიმართ ჩადენილი განზრახ მკვლელობის მცდელობის ფაქტზე გამოძიება სისხლის სამართლის კოდექსის 108-ე და 19-109-ე მუხლის მე-3 ნაწილის „ა“ ქვეპუნქტით მიმდინარეობს.