დიდი ბრიტანეთის პრემიერ-მინისტრი ბორის ჯონსონი და რუსეთის პრეზიდენტი ვლადიმერ პუტინი ბერლინში, ლიბიის კრიზისთან დაკავშირებული საერთაშორისო კონფერენციის ფარგლებში, შეხვდნენ.
ჯონსონისა და პუტინის შეხვედრის შესახებ კომუნიკეს ბრიტანეთის პრემიერ-მინისტრის ოფისი ავრცელებს.
კომუნიკეში აღნიშნულია, რომ ლონდონის პოზიცია, სოლსბერიში, სკრიპალების ოჯახის მოწამვლისას ქიმიური იარაღის გამოყენებასთან დაკავშირებით, შეუვალია და არ შეიცვლება, ვიდრე რუსეთი გააგრძელებს დესტაბილიზაციის გამომწვევ ქმედებებს.
"პრემიერ-მინისტრმა განაცხადა, რომ ორ ქვეყანას შორის ურთიერთობების ნორმალიზება ვერ მოხდება, ვიდრე რუსეთი არ შეწყვეტს დესტაბილიზაციის გამომწვევ ქმედებებს, რაც საფრთხეს უქმნის დიდ ბრიტანეთსა და მის მოკავშირეებს და ძირს უთხრის, როგორც ბრიტანეთის მოქალაქეების, ასევე კოლექტიურ უსაფრთხოებას", - ნათქვამია კომუნიკეში.
მოკლედ სკრიპალების მოწამვლის საქმეზე
რუსეთის სამხედრო დაზვერვის ყოფილი ოფიცრის სერგეი სკრიპალის მკვლელობის მცდელობა დიდ ბრიტანეთში, რომელსაც ადგილი ჰქონდა 2018 წლის 4 მარტს ინგლისის ქალაქ სოლსბერიში.
თავდასხმის შედეგად ასევე მოიწამლა მოსკოვიდან მამასთან სტუმრად ჩასული იულია სკრიპალი და დაზიანება მიიღო სულ მცირე 21-მა ადამიანმა.
ბრიტანელი სამართალდამცავების მიერ გამოძიება მკვლელობის მიზნით თავდასხმის კვალიფიკაციით მიმდინარეობს.
14 მარტს გაერთიანებული სამეფოს მთავრობამ მომხდარში ოფიციალურად ბრალი დასდო რუსეთის სახელმწიფოს და რუსეთის 23 დიპლომატი ქვეყნიდან გააძევა.
წინასწარი ინფორმაციით თავდასხმა განხორციელდა რუსეთის სპეცსამსახურების მიერ საიდუმლო ზემძლავრი ქიმიური იარაღის "ნოვიჩოკის" გამოყენებით.
რუსეთი ტრადიციულად უარყოფს სკრიპალების მოწამვლის საქმეთან კავშირს.
