"ევროპული საქართველოს წევრი", სერგი კაპანაძე აშშ-ის კონგრესის რესპუბლიკელი წევრის, მარკუეინ მალინის პრემიერ გიორგი გახარიასთვის გაგზავნილ ღია წერილს ეხმიანება და აღნიშნავს, რომ ეს წერილი კიდევ ერთი ნათელი დადასტურება იმისა, რომ აშშ-ში არიან ძალიან შეშფოთებულები იმ პროცესებით, რომელიც მიმდინარეობს საქართველოში.
"კონგრესმენ მალინის ღია წერილი პრემიერ გახარიას მიმართ არის კიდევ ერთი ნათელი დადასტურება იმისა, რომ აშშ-ში არიან ძალიან შეშფოთებულები იმ პროცესებით, რომელიც მიმდინარეობს საქართველოში. ეს წერილები არ წყდება. ეს განცხადებები არ წყდება და ეს მოდის არამარტო ჩვენი ევროპელი პარტნიორებისგან, არამედ ასევე ამერიკელი პარტნიორებისგანაც და ამიტომ, ეს უნდა იყოს კარგი გამოსაფხიზლებელი ზარი ხელისუფლებისთვის, მას რომ ოდნავ საღი აზრი მაინც ჰქონდეს შერჩენილი.
ნათელია უკვე ყველასთვის, რომ ქვეყანაში მიმდინარეობს პოლიტიკური ოპონენტების დევნა, არის სერიოზული დარტყმა დემოკრატიულ პროცესებზე. არის ეკონომიკური კრიზისი, არის დემოკრატიული ინსტიტუტების უგულვებელყოფა და ჩვენი პარტნიორები ამით არიან შეშფოთებულები", - თქვა კაპანაძემ.
აშშ-ის კონგრესის რესპუბლიკელი წევრმა, მარკუეინ მალინმა საქართველოს პრემიერ-მინისტრს გიორგი გახარიას ღია წერილით მიმართა.
კონგრესმენი წერს, რომ ის "შეშფოთებულია საქართველოს დემოკრატიული ღირებულებებისგან განგრძობადი გადახვევითა და ეკონომიკური გაუარესებით".
მალინი საქართველოს მთავრობას მოუწოდებს, შეწყვიტონ მტრული დამოკიდებულება ამერიკული კომპანიების მიმართ. ის ასევე აღნიშნავს, რომ ბოლო პერიოდში "საქართველო აშშ-ში უარყოფით შუქზე და სიფრთხილით განიხილებოდა".