შეერთებული შტატების სენატმა პრეზიდენტ დონალდ ტრამპის იმპიჩმენტის პროცესი დაიწყო, რასაც წინ კონგრესის ზედა პალატაში იმპიჩმენტის მუხლების ხმამაღლა წაკითხვა უძღოდა.
იმპიჩენტის პროცესს, რომელიც სენატში ერთგვარი სასამართლო პროცესის სახეს იღებს, უზენაესი სასამართლოს მოსამართლე ჯონ რობერტსი წაუძღვება.
ჯონ რობერტსი სენატში ფიცს დადებს, რის შემდეგაც ყველა სენატორს დაადებინებს მსაჯულთა ფიცს.
სენატი განიხილავს წარმომადგენელთა პალატის მიერ შედგენილ დანაშაულის მუხლს, ან მუხლებს.
სენატს სიმბოლურად, ნაფიც მსაჯულთა ჟიურის როლი ეკისრება, წარმომადგენელთა პალატას - ბრალმდებლის, დაცვის მხარეს პრეზიდენტის ადვოკატები უზრუნველყოფენ, უზენაესი სასამართლოს თავმჯდომარეს კი მოსამართლის ფუნქცია აქვს.
თუკი იმპიჩმენტს სენატორების 2/3 დაუჭერს მხარს, ეს საბოლოო განაჩენია და პრეზიდენტმა პოსტი უნდა დატოვოს.
სენატის კენჭისყრის შედეგი საბოლოოა, ის გასაჩივრებას არ ექვემდებარება. პრეზიდენტის გადადგომის შემდეგ, მის პოსტს იკავებს ვიცე-პრეზიდენტი.
წარმომადგენელთა პალატამ პრეზიდენტ ტრამპის იმპიჩმენტს მხარი გასული წლის 19 დეკემებრს დაუჭირა. პალატამ პრეზიდენტისთვის წაყენებულ ორ ბრალდებას ცალცალკე უყარა კენჭი.
კენჭისყრამდე კონგრესის ქვედა პალატაში 12-საათიანი დებატები გაიმართა.
პალატამ პრეზიდენტს ბრალი ძალაუფლების ბოროტად გამოყენებასა და კონგრესის მუშაობაში ხელის შეშლაში დასდო.