იტალიური მოდის სახლი Versace უარს ამბობს ტანსაცმლისა და ფეხსაცმლის წარმოებაში კენგურუს ტყავის გამოყენებაზე. იტყობინება ბრიტანული The Telegraph-ი.
გადაწყვეტილება ავსტრალიაში მძვინვარე ტყის ხანძრების გამო მილიონობით ცხოველის დაღუპვის ფონზე მიიღეს.
"ამასთან დაკავშირებით ოფიციალური განცხადება არ გაგვიკეთებია, თუმცა შემიძლია დაგიდასტუროთ, რომ ჩვენ საბოლოოდ შევწყვიტეთ კენგურუს ტყავის გამოყენება", - უთხრა The Telegraph-ს მოდის სახლის წარმომადგენელმა.
როგორც გამოცემა იტყობინება, მიუხედავად იმისა, რომ გადაწყვეტილების შესახებ ახლა გახდა ცნობილი, ის 2019 წლის კოლექციის შექმნამდე იყო მიღებული.
იტყობინებიან, რომ კენგურის ტყავის გამოყენებაზე უარის თქმა, იტალიის ცხოველთა უფლებადამცველთა მძლავრი ზეწოლის შედეგად მოხდა.
2019 წლის შემოდგომაზე ცხოველთა უფლებების დამცველებმა ფართომასშტაბიანი კამპანია აწარმოეს კენგურუს ტყავის გამოყენების წინააღმდეგ.
ორი წლის წინ, Versace-მ უარი თქვა ასევე ნატურალური ბეწვეულის გამოყენებაზე.
ხანძრებმა ავსტრალიაში, რომელიც სექტემბრიდან მძვინვარებს, 28 ადამიანი იმსხვერპლა და 2000-ზე მეტი საცხოვრებელი სახლი გაანადგურა.
სიდნეის უნივერსიტეტის კვლევის მიხედვით, ავსტრალიაში ტყის ხანძრებს მილიარდამდე ცხოველი ემსხვერპლა.
ევროკავშირის კოპერნიკის მონიტორინგის პროგრამის ინფორმაციით, ხანძრის შედეგად ატმოსფეროში 400 მეგატონა ნახშირორჟანგი გამოიყო. ექსპერტების აზრით, ხანძრების უპრეცედენტო მასშტაბი და ინტენსივობა კლიმატის ცვლილებით არის განპირობებული.