პოლიტიკური მოძრაობა "ლელო საქართველოსთვის" დამფუძნებელი მამუკა ხაზარაძე ადასტურებს, რომ ვახტანგ რობაქიძე, რომელმაც წუხელ პარლამენტის იურიდიულ საკითხთა კომიტეტის თავმჯდომარე ანრი ოხანაშვილს სიტყვიერი შეურაცხყოფა მიაყენა და დაემუქრა მისი პარტიის აქტივისტია.
როგორც მამუკა ხაზარაძე აცხადებს, დაზუსტებული ინფორმაცია და მომხდარის გამომწვევი მიზეზები არ იციან, ამიტომაც თავს იკავებენ კომენტარისგან. მამუკა ხაზარაძის თქმით, კომენტარს სწორედ დეტალების გაცნობის შემდეგ გააკეთებენ.
შეგახსენებთ, რომ ანრი ოხანაშვილს ბაკურიანში ერთ-ერთ რესტორანში ვახშმობისას ვახტანგ რობაქიძე დაუპირისპირდა. მან ოხანაშვილს ჯერ სიტყვიერი, შემდეგ კი ფიზიკური შეურაცხყოფა მიაყენა. შინაგან საქმეთა სამინისტროში კი ადასტურებენ, რომ ინციდენტში მონაწილე პირი ადმინისტრაციულ სამართალდარღვევათა კოდექსის 173-ე მუხლით დააკავეს, რაც პოლიციისადმი დაუმორჩილებლობას გულისხმობს. მომხდარზე გამოძიება კი სისხლის სამართლის კოდექსის 151-ე მუხლით დაიწყო, რაც სიცოცხლის მოსპობის ან ჯანმრთელობის დაზიანების მუქარას გულისხმობს.
ვახტანგ რობაქიძე 2019 წელს ზესტაფონში მერობის კანდიდატი იყო.