უკრაინის საკანონმდებლო ორგანო, უმაღლესი რადა, განიხილავს დადგენილებას, 2020 წელს ევროპის საბჭოს საპარლამენტო ასამბლეის სესიებში უკრაინის დელეგაციის მონაწილეობის განახლების შესახებ. იუწყება Deutsche Welle.
აღნიშნული ინიციატივით, ევროსაბჭოს საპარლამენტო ასამბლეაში უკრაინის დელეგაციის ხელმძღვანელი ელიზავეტა იასკო გამოვიდა.
ამ საკითხს სოციალურ ქსელში გამოეხმაურა უკრაინული დელეგაციის წევრი, რადას დეპუტატი ოლექსეი გონჩარენკო, რომელმაც დაწერა:
" ამ კვირას უმაღლესი რადა მიიღებს რეზოლუციას ევროსაბჭოს საპარლამენტო ასამბლეის მუშაობაში უკრაინის მონაწილეობის აღდგენის შესახებ.
მანამდე ამ გადაწყვეტილებას დაამტკიცებს რადას საერთაშორისო საქმეთა კომიტეტი. PACE– ს შემდეგი სხდომა სტრასბურგში დაიწყება 27 იანვარს".
საპარლამენტო ასამბლეის უახლოესი სესია სტრასბურგში 27 იანვარს გაიხსნება და 31 იანვრამდე გასტანს.
მანამდე წევრმა ქვეყნებმა ასამბლეის სამდივნოს დელეგაციის წევრთა სიები უნდა წარუდგინონ.
შეგახსენებთ, 2014 წელს რუსეთის მიერ უკრაინის ნახევარკუნძულის, ყირიმის მიტაცებისა და ანექსიის შემდეგ, მოსკოვის დელეგაციას ევროსაბჭოს საპარლამენტო ასამბლეაში ხმის უფლება ჩამოერთვა. ამის საპასუხოდ მოსკოვმა ჯერ დელეგაციის მუშაობა შეაჩერა ასამბლეაში, ოდნავ მოგვიანებით კი საწევროს გადახდაზე თქვა უარი.
გასული წლის ივნისში, ევროსაბჭოს საპარლამენტო ასამბლეამ, სრულად აღუდგინა რუსეთის დელეგაციას ხმის უფლება, რასაც მკაცრად ეწინააღმდეგებოდნენ უკრაინის, საქართველოს, დიდი ბრიტანეთისა და კიდევ რამდენიმე ქვეყნის დელეგაციები.
რუსეთის დელეგაციის აღდგენის პროტესტის ნიშნად უკრაინის დელეგაციამ საპარლამენტო ასამბლეაში მონაწილეობაზე უარი თქვა.