ირანის ისლამური რევოლუციის გუშაგთა კორპუსის "ყუდსის" ქვედანაყოფის ყასემ სულეიმანის დაკრძალვის ცერემონიალს, თეირანის ქუჩებში, ათეულათასობით ირანელი დაესწრო.
ყასემ სულეიმანის ქალიშვილმა ზეინაბ სულეიმანმა ირანის სახელმწიფო ტელევიზიის ეთერში თქვა, რომ დონალდ ტრამპმა არ უნდა იფიქროს, თითქოს გენერლის მკვლელობას შესაბამისი პასუხი არ მოჰყვება.
"შეშლილო ტრამპ, ნუ იფიქრებ, რომ მამაჩემის მკვლელობით ყველაფერი დამთავრდა", - თქვა ზეინაბ სულეიმანმა.
მისივე თქმით, შეერთებულ შტატებსა და ისრაელს "შავი დღეები" დაუდგებათ.
თეირანში სამგლოვიარო ცერემონიალზე თავმყორილი მოქალაქეები სკანდირებდნენ "სიკვდილი ამერიკას".
ცერემონიას ესწრებოდნენ ირანის უმაღლესი პოლიტიკური, სასულიერო და სამხედრო პირები, პრეზიდენტი ჰასან როჰანი და უზენაესი ლიდერი აიათოლა ალი ხამენეი.
შეერთებულ შტატებსა და ირანს შორის დაძაბულობის ახალი ტალღა ირანელი გენერლის ყასემ სულეიმანის მკვლელობას მოჰყვა.
ერაყის დედაქალაქ ბაღდადში, აეროპორტის სიახლოვეს, შეერთებული შტატების მიერ განხორციელებული სარაკეტო დარტყმის დროს, მოკლეს ირანის ისლამური რევოლუციის გუშაგთა კორპუსის ერთ-ერთი ელიტარული ქვედანაყოფის "ყუდსის" ლიდერი, გენერალი ყასემ სულეიმანი.
გენერალ სულეიმანის მკვლელობის გამო ირანში 3-დღიანი გლოვა განაცხადა. ქვეყნის უზენაესმა ლიდერმა აიათოლა ალი ხამენეიმ განაცხადა, რომ ირანი ყასემ სულეიმანის გამო შურს იძიებს.