რუსეთის მართლმადიდებლურმა ეკლესიამ შეწყვიტა ალექსანდრიის პატრიარქის თეოდორე მეორეს დიპტიქში მოხსენიება. შეწყდა ასევე ეკლესიებს შორის ევქარიუსტიული ერთობა. აღნიშნული გადაწყვეტილება რუსეთის ეკლესიის სინოდის დღევანდელ სხდომაზე მიიღეს.
სინოდის ეს გადაწყვეტილება უკავშირდება ალექსანდრიის პატრიარქის მიერ უკრაინის მართლმადიდებლური ეკლესიის ავტოკეფალიის აღიარებას.
ამავდროულად, სინოდმა აღნიშნა, რომ რუსეთის ეკლესია არ გაწყვეტს ურთიერთობას ალექსანდრიის ეკლესიის იურისდიქციის ქვეშ მყოფ იმ სასულიერო პირებთან, რომლებიც მხარს არ უჭერენ უკრაინის ეკლესიის ავტოკეფალიას.
ალექსანდრიისა და სრულიად აფრიკის პატრიარქმა თეოდორე მეორემ უკრაინის მართლმადიდებლური ეკლესიის საჭეთმპყრობელი, მიტროპოლიტი ეპიფანე წირვისას ამ წლის ნოემბერში მოიხსენია, რაც ეკლესიის ავტოკეფალიის პრაქტიკულ აღიარებას ნიშნავს.
ალექსანდრიისა და სრულიად აფრიკის საპატრიარქო ტახტი პირველია უძველეს მართლმადიდებლურ საყდრებს შორის [კონსტანტინოპოლის შემდეგ], რომლის მწყემსმთავარმაც უკრაინის მართლმადიდებლურ ეკლესიასთან ევქარისტიული კავშირი დაამყარა, მოიხსენია რა მისი მეთაური საეკლესიო დიპტიქში.
ალექსანდრიის საპატრიარქო მეორე ადგილს იკავებს მართლმადიდებელი ეკლესიების დიპტიქში.
აღსანიშნავია, რომ ბევრმა ადგილობრივმა ეკლესიამ უკრაინის ეკლესიის ავტოკეფალიის ცნობასთან დაკავშირებით განაცხადა, რომ ისინი დაელოდებიან, რა გადაწყვეტილებას მიიღებენ უძველესი საპატრიარქო საყდრები და მას შემდეგ მიიღებენ თავის გადაწყვეტილებას.
აღსანიშნავია, რომ საქართველოს ეკლესიას უკრაინის ეკლესიის ავტოკეფალიასთან დაკავშირებით ოფიციალური პოზიცია ჯერ არ გამოუმჟღავნებია.